Tlabung Block chhung Nunsury-I-ah “I Kawtkaiah Sawrkar” hun buatsaih a ni
Lunglei District Bawrhsap (Deputy Commissioner) bul tuma mipuite’n sawrkar hma lakna hrang hrangte an chhawr ṭangkai theih nan an khuaa kal chilha service hrang hrang chhawp chhuahsakna, “I Kawtkaiah Sawrkar” (Prashasan Gaon Ki Ore) chu a thawh thum nan vawiin khan Tlabung RD Block chhunga Nunsury-I khuaah Nunsury-I leh a chhehvel khaw mipuite tan buatsaih a ni.
Vawiina Nunsury-I-a I Kawtkaiah Sawrkar hun buatsaihah hian office hrang hrang — Sub-Divisional Officer (Civil) Office, Block Development Office, Agriculture & Farmers Welfare, Animal Husbandry & Veterinary, Health & Family Welfare, Public Health Engineering Department leh bank lam te’n stall hawngin, awlsam zawka mipuite dawr theih turin an inpho chhuak a. Lehkha pawimawh hrang hrang siam thar/siam ṭhat theihna hun hawnah Aadhaar 72, MGNREGS job card 40, voter ID card 31 leh ST/Residential Certificate 19 dilna dawn leh buaipui niin, sawrkar scheme hrang hranga inziah luhna hun hawnah PM KISAN-ah 70 leh PMSBY leh PMJJBY-ah dilna 10 dawn a ni a.
Damlo inentir mi 72 awmin, ran damlo entir leh hri danna pek 38 an awm a. PHE te’n tuizem (syntex) semin, tui renchem leh ruah tui khawl chungchang inzirtirna an buatsaih bakah, BDO Office aṭangin DDUGKY chungchang inzirtirna buatsaih a ni bawk a. He’ng service hrang hrang chhawp chhuahte hi mi 500 velin an chhawr ṭangkai a ni.
