Lungleiah Vohbikte Ni, “International Day of Persons with Disabilities” hman a ni
Vawiin khan Lunglei District Social Welfare Office bul tumin Lungleia Onyx Special School-ah Vohbikte Ni, “International Day of Persons with Disabilities” hman a ni. He hun hi Lunglei District Social Welfare Officer Pu CL Joseph chuan hmanpuiin, “International Day of Persons with Disabilities” hi kum 1992 aṭang khan United Nations-in kum tin December ni 3-a hman tura a ruahman thu leh mipui nawlpuiin vohbikte dinhmun leh harsatna an tawh hriat thiampui a, an dikna leh chanvo humhalhsak a, nunphung pangngaia an nun theih nana ṭanpuina hrang hrang ruahmansak tura inzirtirna ni atan ruahman a nih thu te a sawi a. India ram pumah Rights of Persons with Disabilities Act 2016 hman mek a nih thu leh he dan hnuaiah hian vohbikte tan zirna in sang zawkah seat zaah panga (5%) hauhsak te, sawrkar hnaah zaah pali (4%) hauhsak te, mi rethei chawi kanna scheme-ah zaah panga (5%) hauhsak leh sawrkar building-ah leh zirna inah awlsam zawka an lawilen theih nana ruahmanna siamsak te a tel tih a sawi.
Social Welfare Department-in vohbikte tana hma lakna hrang hrang a kalpui mekte tar langin, Lunglei District-ah vohbik 103 hnenah chhawmdawlna, IGNDPS thla tin ₹1,300/- ṭheuh pek a nih thu te, State Disability Pension Scheme hnuaiah vohbik 28 hnenah kum tin ₹6,000/- ṭheuh pek a nih thu leh vohbik zinga lehkhathiam hna nei lo, District Employment Exchange-a inziak lutte hnenah unemployment allowance pek a nih thu te a sawi a. Vohbikte tan puan ṭhui leh pheikhawk chhe siam zirna Training Centre for Specially Abled Persons chu Lungleiah kalpui mek a nih thu sawiin, zirlaite hnenah thla tin stipend pek ṭhin a nih thu leh an zir zawhah puan ṭhui khawl leh pheikhawk chhe siamna hmanrua pek ṭhin a nih thu a sawi.
Mizo Hmeichhe Insuihkhawm Pawl (MHIP) Sub Headquarters Lunglei Finance Secretary, Onyx Special School Principal ni bawk Pi Vanlalpianpuii’n hun kaihruaiin, Onyx Special School zirlaite, Traning Centre for Specially Abled Persons zirlaite, vohbik sawm bikte leh MHIP Sub-Headquarters hruaitute an tel a ni.
