Deputy speaker-in 1st kolasib open chess championship 2025 a hmanpui
Vawiin khan Parish Hall, Kolasib-ah 1st Kolasib Open Chess Championship 2025 neih a ni a. Pu Lalfamkima ,Mizoram Legislative Assembly Deputy Speaker chuan Khuallian niin he hun hi a hmanpui. Khuallian, Deputy Speaker chuan thu sawiin, Chess chu infiamna dangte ang lo takin, a khelh chhung a rei a, hei hian inkhelte inkarah inpawhna tha tak a siam a, an inthiantha nghal mai thin a ni, a ti. Chess chu ngaihtuahna sen ngai tak, rilru sawizawina tha tak ni si, a game erawh sum sen hautak miah lo a nih avangin thangtharte hian uar zual zel se a duh thu a sawi bawk.
Deputy Speaker chuan tunlai thalaiten Chess an tuipui chho zel chu lawmawm a tih thu sawiin, infiammi kalkhawmte chu hmabak North East level competition-ah te pawh tha taka an tih theih nan duhsakna a hlan nghal a ni.
Vawiina 1st Kolasib Open Chess Championship 2025-ah hian District 6 atangin mi 60 an tel a. Category hrang hrang pathumah then niin, Open Category-ah mi 32, 50 above category-ah mi 18 leh Junior category-ah mi 10 an tel a ni. He Championship-a tel zinga upa ber chu kum 75 mi niin, naupang ber chu kum 10 mi a ni.
