MZU AH NI THUM AWH TUR DISASTER MANAGEMENT TRAINING BUATSAIH
Ni thum awm tur “Three- Day Capacity Building Training on Inspiring the Minds for Disaster Risk Reduction (IMDRR2025)” chu vawiin atang khan, MZU Centre for Disaster Management buatsaihin Conference Hall, MZU Education Department-ah neih tan a ni a. A hawnna inkhawm hi Aizawl District Disaster Management Authority (ADDMA) Chairman, Er. Lalhriatpuia chuan khuallian niin a hmanpui a, Prof. Lalnundanga, MZU Registrar chu khual zahawm a ni.
ADDMA Chairman, Aizawl bawrhsap ni bawk Er. Lalhriatpuia chuan thusawiin, rikrum kaihhnawiha biak pawh theihna, 24×7 Emergency Control Room no. 1077 hman theih a nih thu a sawi a. Aizawl District huam chhunga chhiatrupna thuah Operational Zones 17 leh Zonal Officers 16 siam a ni a. May ni 30, 2025 khan hnawl vung paih dan tura hmalak dan tur, Debris Clearance SOP siam a nih thu a sawi bawk. SOP siam hma hian Rs. 221, 68,054/- sen a nih laiin, SOP siam hnuah chuan Rs. 40, 97,300/- chauh sen a ni tawh a, Rs. 180, 70,754/- (81.52%) laiin a tla hniam tih a tarlang a. SOP angin, chhiatna thlen hma, thlen lai leh then fai a nih hnua thlalak a ngai a; Zonal Officer-ten anmahni huamchhungah an enfiah hnuah, hnawl vung paih zat milin pawisa pek chhuah a ni. India rama Debris Clearance SOP siam hmasak ber a nih avangin, hmun danga hman anih ve theih nan NDMA lam pawhin an ngaihven thu a sawi bawk.
Khual zahawm, Prof. Lalnundanga pawhin thusawiin MZU-a Centre for Disaster Management leh, department puitlinga hlang kai tura beih mek a nih thu a tarlang.Training hawnna inkhawm hi Prof. V.P. Sati, Dean, SES&NRM-in a kaihruai a. National Institute of Disaster Management (NIDM) Sr. Consultant, Dr. Preeti Soni leh Convener, Prof. Lalnundanga-ten inlawmna thu an sawi bawk.Ni thum awh training turah hian, District hrang hranga Disaster Management khawih SDC officer-te leh incharge te, College hrang hrang zirtirtitute leh MZU-a Professor, scholar leh zirlaite an tel a ni.
