Sports Minister in Kolasib-a football academy leh Naupang League khelh mek tlawh
Vawiin khan Pu Lalnghinglova Hmar, Minister of State, Sports & Youth Services Department chuan Kolasib Saidan-a Regional Sports Training Centre (RSTC) chu a hmunah tlawhin thil awm dante a en a, naupangte fuihna thu sawiin thawktute nen hmalak ngaihna laite an sawi.
RSTC, Saidan hi Sports & Youth Services Department hnuai niin, mipa naupang kum 17 chin hnuailam tana football zirna (residential academy) a ni a, DSYO leh coach in an awmchilh a ni. Tun dinhmunah naupang 30 an awm mek. Kumin May thla khan Bihar-a Khelo India Youth Games-ah Mizoram aiawha kalin Bronze medal an la a. September, 2025 a Subroto U-17 Boys khelh zawh takah khan player damlo awm nual chungin semi final an thleng bawk a ni.
RSTC, Kolasib-ah hian Minister hi Warden Pu Zonunmawia leh Kolasib-a SYS staff te’n an lo dawngsawng a ni.Sports Minister Pu Lalnghinglova Hmar hian vawiin vek khan Kolasib District Football Association leh Reliance Foundation-in Kolasib District Stadium-a Naupang League an khelh mek a tlawh a, naupangte fuihna thu a sawi. Naupangte chu football hmanga nun dik zir tel tur leh, tun atanga zu leh ruihhlo tichhin lo tura thutlukna nghet siam turin a chah a ni.
