Mizoramah Faina beihpui hlawhtling takin kalpui a ni
Sorkar laipui hmalakna hnuaia mipuite hnena faina pawimawhzia inzirtirna, Swachhata Hi Seva hmalakna kalzelah Mizoram hmun 7-a bawlhhlawh inchhekkhawl hnem tawh, nikhat thilthua tihfai mai thei tawh lo te thenfai an ni tawh.
Akashvani Aizawlin a kawmnaah Pi Lalrinthari Zadeng chuan kumina Swachhata Hi Seva thupui, “Swachhotsav’ tih chu faina kutpui tiin a lehlin theih tih sawiin, kumin 2025-ah hian Swachhata Hi Seva chuan innghahna 5 a nei a, District headquarters leh khaw hrang hranga hman turin inkaihhruaina siam a ni a ti a, chung zingah chuan bawlhhlawh inchhekkhawl hnem tawh, nikhat thilthua tihfai theih mai ni tawh lo thenfai ngai, Cleanliness Targets Unit chu Mizoramah 200 chhinchhiah ni tawhin, heng zinga 7 te chu thenfai vek an ni tawh a ni.
Swachhata Hi Seva hi kum 2017 atangin kumtin chawlhkir 2 chhung ram pumah hman thin a ni a, India hnampa Mahatma Gandhi piancham October ni 2-ah a kharna hun hman thin a ni a, Mizoramah pawh ram pum rualin kumtin hman ve thin a ni a, he hmalakn hi Swachh Bharat Mission hnuaia neih thin niin, Ministry of housing and urban affairs leh Department of drinking water and sanitation hnuaiah khawpui Urban leh thingtlang Gramin kalpui a ni a, Mizoramah chuan khawpui chu UD&PA in a chang a, thingtlang chu PHE department in a chang thung a ni.
