Transport minister-in bengaluru-ah zirna kutpui hmanpui
Vawiin khan Transport Minister Pu Vanlalhlana chuan Mizo Students’ Association (MSA) Bangalore-ten kumtina an buatsaih ‘Zirna Kutpui’ chu United Theological College, Bengaluru-ah khuallian niin a hmanpui a ni. Khullian chuan zirlaite chu Mizoram pawna an awm chhan hre reng turin a chah a. Nakin lawka kan ram leh khawtlang hruaitu turte in ni tiin, tun atanga kum engemawzat in hman dan hian in hmalam hun thui tak a hril dawn a ni, a ti. Zirlaibu atanga thiamna chu a tawk tawh lo tiin thiam thil dang nei tura inzir chhunzawm zel tur leh khawvel inher danglam mila insiamrem thiam turin a chah a ni.
Pu Vanlalhlana chuan zirlaite chu harsatna hrang hrang an la tawk chho dawn a ti a. Beidawng mai lo tur leh, chung harsatnate chu chhelna leh tumruhna nena hmachhawn zel turin a duh thu a sawi a ni. Kan ram pawnah eizawnna opportunity tam tak a awm nia a ngaih thu sawiin, hnam dang zinga mi competitive tak ni turin, discipline neih a pawimawh a ti a. Sawrkar hna bakah private sector-ah ngei pawn thiamna nei, a ngaihna hre tan chuan dinchhuahna tur a awm a ni, a ti bawk.
Zirna Kutpui hi MSA Vice President Tv. Benjamin Zorinsanga’n a kaihruai a. MSA Secretary Nl. Lalhminghlui atang report nghaihthlak a ni. He hunah hian zirlai ti thate chawimawina hun hman a niin, inelna hrang hranga lawmman sem a ni bawk.
