Chief minister-in hulhhliap short stay centre tlawh. Centre-a lut zaa 74 an fihlim zui zel rih
Vawiin khan Chief Minister Pu Lalduhoma chuan sorkar-in PPP Mode-a Synod Camping Centre, Neihbawia a kalpui Hulhhliap Short Stay Centre a tlawh a, Pi Lalrinpuii, Social Welfare Minister chuan a tawiawm.Thusawii Pu Lalduhoma chuan, kan ramah ruihhlo vanga harsatna tawk kan tam avangin sorkar chuan tun leh tuna kan mamawh ber nia ngaiin Hulhhliap Short Stay Centre kalpui thain kan hria a. Sorkarin amah maia a tih theih loh avangin YMA/MHIP leh Synod te chu phungbawma sawmin PPP mode-in a kalpui ta ni. Ruihhlo ngaite chu an nghei theih nan kan tanpui a ni satliah lo va, a nghei hlenten eizawnna an neih theihna turin Skill Training changkang tak kan pe nghal a. Hetiang taka ruihhlo ngaite enkawlna kalpui hi a dang sawi tur a vang viau mai thei. A sim duh tak takte tan chuan tun hun tluka hun tha hi a awm lo a ni, a ti.
Supply lam dan chah tumin hma kan la nasa thin a, a man pawh kan man nasa a, a Sangha lian pawh kan man zauh zauh tawh a ni. Tunah hian ram dang atanga a rawn luhnate dan chah tumin Operation Jeriko kan kalpui leh mek. Tin, Security Coordination Committee kan din a, kan rama security agent hrang hrangte kan thukhawm a, hma kan la ho va, kan thawhhona a tha hle ni. Ruihhlo la ti ve lo, thangtharte hnenah pawh drugs that lohzia uar takin zirtir a ni a, Nasha Mukt Bharat Abhiyan hmangin district tinah campaign neih a ni. Ruihhlo bawiha tan hauh loh dan chu – tih chhin miah loh – a ni a, thangtharte hnenah i hrilh mawlh mawlh ang u, a ti. Damlo enkawl mekte chu sim tumna tak tak nei tura fuihin, he hmun in chhuahsan hunah thlemna tam tak in hmachhawn dawn a. Chung thlemna zawng zawngte chu lo hnar ngam ang che u. In za hian mi hlawhtling, ram leh khawtlang tana mi tangkai tak tak in ni thei vek a ni. Ruihhlo bawiha kan tan chhan ber nia kan sawi tam tak, kan nuna harsat kan tawhte hi midangte pawhin an lo tawk ve tho va. Chhel taka tuarin an lo paltlang thin. Harsatna leh mangannate hi sual phah nana hmang lovin Pathian auh nan zawk hmang zel zawk ila, Pathian malsawmna kan dawng thin a ni, a ti.
Chief Minister hian Hulhhliapa thawktute chungah lawmthu sawiin, taksa leh thlarau chhandamna, ram leh hnam humhimna hna an thawk a ni tih hria a, phur taka thawk chhunzawm zel turin a chah. Pi Lalrinpuii, Minister pawhin thusawiin damlo enkawlte chu rilru nghet tak pua ruihhlo laka fihlim zui zel turin a fuih a ni.Inkhawm hi Pu Malsawmzuala Ralte, Hulhhliap SSC Core Committee Chairman chuan a kaihruai a, Dr. Lalhriatzuali Ralte, Member Secretary, Core Committee chuan report a pe a. Pi Ruth Vanlalsawmi, Centre Director chuan Camping report a pe a, Pi Lalzarmawii, Commissioner & Secretary, SW&WCD chuan lawmthu sawiin inkhawm a khar a ni. Hulhhliah SSC hi tum khata mi 150 zel enkawl theihna tura duan ni mahse diltu an tam avangin batch hmasa berah mi 256, batch hnihnaah mi 544 leh batch thumna, tuna kalpui mekah hian mi 208 admit an ni a. Batch khat hi ni 20 chhung zel niin a tir lam ni 10 chhung detoxification kalpui a ni a, a dawt ni 5 chhung chu rilru lam enkawlna (Psychological Counseling) atan hman niin a bak ni 5 chu Synod Revival Department bultumin Camping neihzui thin a ni. An chhuah hnuah Referral Task Group ten thla thum chhung an thli thlai zui a, ruihhlo laka fihlim zuite tan Skill Training kalpui leh a ni.
Skill Training-ah hian Food Processing ah mi 11 an training chhuak tawh a, training hi a taka tihchhin (practical) nena kalpui zel a ni. Electrical Technician hi mi 28 in an zir mek a, Alluminium Fabrication hi mi 18 in an training mek bawk. National Skills Qualification Framework (NSQF) Government of India in a duan ang thlapin training hi pek an ni a. Mizoram Council for Vocational Training hminga Certificate pek vek tum a ni. Hulhhliap Short Stay Centre kalpui nan hian sorkar chuan Rs. 108 lakh a pe a. Batch 4 na hi September thla hian neih leh tum niin a tul anga kalpui chhoh zel tur a ni ang. Batch hmasa ber leh a dawttua lutte an chhuizuinaah vawiin thlengin zaa sawmsarih leh pali (74%) te chu ruihhlo lakah an fihlim zui zel tih hmuhchhuah a ni.
