Health & Family Welfare Minister Pi Lalrinpuii’n Ṭawipui South Branch YMA Golden Jubilee lawmna hun a hmanpui
Young Mizo Association (YMA) Ṭawipui South Branch-in an kum sawmnga tlin, golden jubilee lawmna hun an buatsaih chu vawiin khan Mizoram sawrkara Health & Family Welfare Minister Pi Lalrinpuii chuan khuallian niin a hmanpui a. Golden Jubilee lawmnaah hian Lunglei South bialtu MLA Pu Lalramliana Papuia chu khual zahawm a ni.
Minister Pi Lalrinpuii chuan zing dar 10-ah Golden Jubilee Lungphun a hawng a. Ṭawipui South Community Hall-a YMA Golden Jubilee lawmna inkhawm buatsaihah thu sawiin, nu leh pa aṭanga an khaw chhuahna Ṭawipui South Branch YMA-in Golden Jubilee a thleng ta leh a lawmna hun hmanpui tura sawm a ni chu lawmawm a tih thu a sawi a. Ṭawipui South chu ei leh bar zawnna kawngah kawngpuiah an innghah thui thu leh khualzin veivakte tana chawlhna leh chaw eina hmun lar tak a nih ṭhin thu sawiin, Kaladan Multi Modal Transit Transport Project (KMMTTP) kal tlanga ram dang nena insum dawn tawnna kawngpuiin a pal tlang tur khua a nihna chu hmasawnna nasa zawk atana hmang thei tura ngaihtuahna seng turin khaw mipuite a chah.
Health Minister Pi Lalrinpuii chuan Ṭawipui South-a PHC ṭha tak awm chu sawrkarin a thuam ṭhat zel thu leh Ambulance thar pawh pek a nih thu sawiin, mipui tan ṭangkai taka hman a nih a beisei thu a sawi a. Khum 10 awmna Ṭawipui South PHC-ah sawrkarin sum tam tak senga building, hmanrua leh thawktu a dah chu a ṭangkai thei ang bera hman tum turin khawtlang mipuite a chah a. Mi rethei leh harsa zawkte sum sen ngai lova damdawi ina an inenkawl theihna – Mipui Healthcare (MUHCS) sawrkarin a ruahman leh Ruang Phurh Scheme hnuaia chhungte ruang phurhna man tumsak an ni te chu mipui thleng phak sawrkar hma lakna pawimawh tak a nih thu sawiin, a chhawrtute lawm hmel chu mipui rawngbawlna kawnga chakna petu a nih thu a sawi a. Mizoram chu ruihhlo leh HIV/AIDS-in a run mek thu leh sawrkar pawhin Hulhliap Short Stay leh programme hrang hrang kal tlanga theih tawpa hma a lak thu sawiin, YMA, kohhran, chhungkua leh mi tinte mahni zawn ṭheuhvah ruihhlo dona kawng leh HIV/AIDS venna kawngah ṭhahnem ngai taka hma la zel turin a sawm a ni.
Minister Pi Lalrinpuii chuan ‘Ṭanpui ngaite ṭanpuitu – YMA’ chu pawl zahawm leh pawimawh tak a nih thu sawiin, YMA-in ram leh hnam leh khawtlang tana a hna thawh chu ṭha leh hlu a tih thu a sawi a. YMA member-te chu ram leh hnam hmachhuan, ram hma hun innghahna an nih angin hun hman ṭhat kawngah te, zirna kawngah te, infiamna lamah leh khawtlang ṭhatna tur kawng hrang hrangah theih tawp chhuah tur te’n a chah a. Golden Jubilee chu YMA member-te leh khawtlang mipuite tan mi dangte ṭanpui kawngah te, khawtlang hmelma ruihhlo leh HIV/AIDS dona kawngah te chakna thar petu ni se a duh thu sawiin, Ṭawipui South Branch YMA chu mi rethei, chanhaite tana innghahna leh chhawmdawltu ni zel turin duhsakna a hlan nghal bawk.
