LMC hotute’n thu thar theh darhtute hmaah an hma lakna hrang hrang an puang
Lunglei Municipal Council (LMC) hotute chuan vawiin khan Lunglei Convention Centre-a BoC Meeting Hall-ah LMC din tirh aṭanga an hma lakna hrang hrangte thu thar theh darhtute hmaah an puang. LMC Chairman Pu Lalzuithanga chuan hun kaihruaiin, LMC hma lakna hrang hrang a tar lang a. Chairman hi Vice Chairman Pu K. Lalrinawma, Executive Councillor – Pu Zorinsanga Hmar leh Pi Lalhruaitluangi Sailo, Chief Executive Officer Pu Donny Lalruatsanga leh Secretary Pi Zoramdini te’n an ṭawiawm. He huna tar lan a nih danin, LMC hi kum 2022 April ni 8 khan din niin, ni 29.03 2023-ah inthlan hmasa ber buatsaih a ni a; mumal taka office luah ni chu ni 13.04.2023 a ni. LMC hnuaiah regulations leh rules pakua hman leh kalpui mek niin, he’ng zingah hian LMC Licensing Regulations, LMC Control of Parking and Collection of Parking Fees Regulations, Solid Waste Management Bye Laws leh The Mizoram Urban Area Building Regulations te chu a langsar zual a ni a. LMC hnuaiah subject leh fund hrang hrang kalpui mek 17 awmin, he’ng zingah hian Urban Local Body Grant, Ward Fund, Building Regulations leh Property Tax te chu a langsar zual a ni bawk.
State Priority Projects (SPP) hnuaiah Lunglei khawpui tana pawimawh tur project panga, cheng vaibelchhe 17.50 hu pawmpuina hmuh tawh niin, chu’ng zingah chuan Sazaikawna LMC Complex sakna tur (₹ vaibelchhe 4), Hrangchalkawna Transport Hub sakna tur (₹ vaibelchhe 3.5), Ramthar AOC-a Market Shed sakna tur (₹ vaibelchhe 2) leh C. Ṭhuamluaia Muala Multi-Level Car Parking sakna tur (₹ vaibelchhe 3) te a tel a. Green Park siamna tura SPP aṭanga cheng vaibelchhe 5 pawmpuina hmuh tawh chu remchan zawkna avangin Saikuti Hall chei ṭhat nana hman turin Board of Councillors (BoC)-in a pawm tawh thu leh DPR siam tura inbuatsaih mek a nih thu tar lan a ni bawk.
LMC hma lakna hrang hrang tar lan zingah, kum 2025 Krismas Bazar chu BoC-in a pawm angin Task Force Committee on Krismas Bazar chuan hmun remchang melhin ruahmanna a kalpui mek tih tar lan a ni a. Kum 2025 Krismas vuakveta kawn chei ṭha leh mawite tan LMC-in lawmman siam a tum thu leh lawmman hi pakhatna cheng nuai 3, pahnihna cheng nuai 2 leh pathumna cheng nuai 1 bakah, veng pathum tan consolation prize cheng sing 3 ṭheuh pek tum a nih thu tar lan a ni bawk.
