Siaha-ah Har Ghar Tiranga thawh hnihna pualin kawng zawh a ni
Sawrkar Laipui, Ministry of Culture thuchhuak angin kumin Independence Day vawi 79na denchhana Har Ghar Tiranga puala lawmna chu Siaha District-ah pawh phase 3 a thenin hman a ni a, a lawmna thawh hnihna pualin tukin khan Kawng zawhna (Yatra) neih a ni a, Siaha Vaihpi Playground atangin Bazar Traffic Point thleng zirlai naupangte leh mipuiin kawng an zawh a ni.
Har Ghar Tiranga puala kawng zawh dan tur chu Pu Beimosia Lapi, Addl SP chuan mipuite a hrilhhre hmasa a, India in zalenna a hmuh lawmna pual hian Selfie with Tiranga te pawh neih nghal a ni. Vawiin kawng zawhah hian mi 700 chuang an chhuak thei a, chúng zinga mi 630 te chu zirlaite an ni.
He hun kharna programme tawi Bazar Traffic Point a neihah District Bawrhsap Pu VL Hruaizela Khiangte kalkhawm mipuite chu India in zalenna a neih hlutzia hre thar turin a fuih a, Independence Day lo thleng tur chu hlim leh lawm taka hmang theuh turin duhsakna a hlan nghal bawk a ni.Har Ghar Tiranga lawmna thawh khatna chu August ni 8 khan hman tawh niin, School thlanchhuahah Tiranga Inspired Wall painting buatsaih a lo ni tawh a, He kawng zawh hi â lawmna thawh hnihna niin a thawh thumnaah chuan Sawrkar pisa ah te leh Mimal Inah Hnam puanzar phochhuahna run pui neih a ni dawn bawk a ni.
