Project BLOOM hma lakna hnuaiah Lungsen Aspirational Block-ah damdawi ina nau neih 43.14% aṭangin 72.2%-ah a pung
Aspirational Block Programme leh Project BLOOM (Better Living through Outreach, Optimal Maternal & Child Health) kal tlanga Lungsen Aspirational Block huam chhunga nu leh naupang hriselna atana hma laknaah hmasawnna hmuh zel niin, nau piang zat aṭanga chhuta damdawi ina nau neih zat chuan a ṭum khat nan June–July 2025 chhungin 70% a kai.
Lungsen RD Block chhunga damdawi ina nau neih (institutional delivery) zat chu March 2023-a 14.73% aṭangin Aspirational Block Programme hnuaia hma lakna kal tlangin March 2025-ah 43.14%-ah a kai chho va. June 2025-a Project BLOOM kalpui hnuah hmasawnna nasa zawk hmuh belh niin, June–July 2025-ah chuan 72.2%-ah a kai chho tawh.
He’ng hmasawnna hi Project BLOOM hnuaia nu nau paiin damdawi in ngeiah nau a neih theih nana inzirtirna te, a thlawna koh mai theih tur lirthei – Safe Womb Wheel’ ruahman te, nau nei tur leh buaipuitute lo chawlh lailawkna khualbuk (waiting room) ruahman te, raipuar an nau pai aṭanga thla thum chhunga inziak lut (register)-te hnena ‘BLOOM Gift Basket’ pek te leh hma lakna dang dang rah chhuah a ni.
Raipuarte’n enkawlna leh chaw ṭha a hun taka an dawn theih nana nau pai aṭanga thla thum chhunga inziah luh (antenatal care – ANC registration) chungchangah pawh hmasawnna hmuh niin, nau pai tirh thla thum chhung (1st trimester)-a inziak lut March 2023-ah 50.6% an awm laiin, June–July 2025-ah chuan 65.38%-ah a pung chho tawh a ni.
