Serchhipah media workshop neih a ni
Vawiin chawhnu khan Serchhip Press Club-ah District Information & Public Relations Office leh District MJA tangkawp buatsaihin Media Workshop hlawhtling taka neih a ni.
Pi Lalnunmawii, MIS, Deputy Director, I&PR leh DIPRO Serchhip District ni bawk chuan he hunah hian ‘Traditional Media leh New Media’ chungchanga District MJA Member te hriat tur, an kal zelna atana tul leh pawimawhte sawiin MJA member te a fuih a. Pu Vanneihtluanga paper buatsaih a chhiarchhuak bawk. Serchhip District MJA President Pu C Lalhminghlua’n ‘Mizo Tawng ziah dan dik’ tih thupui hmanga Dr H Laldinmawia thuziah chu chhiarchhuakin a sawizau a. Chairman kaihhruaina hnuaiah kalkhawmten heng thupui pahnih sawihona hun an hmang a, rawtna hrang hrang te an thawhkhawm a ni.
Khawvel thang zela social media than chakzia leh chumi hmang tangkai thiam nih a pawimawhzia vawiin hian zirho a ni a. Journalist-te chu Mizo tawng ziak hnem ber leh chhiartu ngah ber an nih avangin Mizo tawng dika chanchinthar an ziah leh puanchhuah a tulzia zirho a ni bawk a ni. Vawiin programme hi Serchhip District MJA Vice President Pu Kapliana Pachuau chuan a kaihruai a. An member thar Pu Vanlalzarzova, Zawlbuk Aw Editor, Thenzawl lakluhna hun neih nghal a ni a. Member thar lakluhna hun hi Pu C Lalhminghlua, Serchhip District MJA President chuan a hmang a ni.
