Champhaiah District Drug Disposal Committee hovin ruihhlo halral a ni
International Day Against Drugs Abuse and Illicit Trafficking denchhenin vawiin khan Champhai District Drug Disposal Committee chuan ruihhlo cheng ₹1,17,03,45,500 vaibelchhe 117 nuaih 34 sang 5500 hu an halral a, Champhai Bawrhsap Pu Mohammad Aaquib chu khuallian a ni. He hun hi Champhai District Hospital Complex-ah hman niin Pu Dennis Vanlallura, Dy. SP Champhai chuan a kaihruai a, tuna ruihhlo halral tura chhawpchhuahte hi thubuai chin fel loh vanga February thlaa halral hman loh te an nih thu a tarlang. He huna khuallian Pu Mohammad Aaquib chuan Champhaiah hei zat ruihhlo man a ni chu ropui a tih thu sawiin, hei hian Mizoram mai ni lo, India ram hmun hrang hrangah ruihhlo dona kawngah nasa taka nghawng a neih thu a sawi a, ruihhlo do kawnga inzirtirna leh inhrilhhriatna neih thin a ni te hian thalaite mah ruihhlo that loh zia leh do a tul zia nasa takin a tuk mek tih a sawi a, ruihhlo manna kawnga tha thawhtu zawng zawng – Police, Excise, Assam Rifles, Custom Department, SIB, SB leh chanchinbu mite chungah lawmthu a sawi a ni.
He hunah hian Champhai District SP Pu Lokeshwaran R chuan India ram hmun hrang hranga tawlh luh tur Champhai a lo dangchat thintu Dan leh thupek kengkawhtute chungah lawmthu a sawi a, Police te hian ruihhlo kengtute chauh man hi an tum a nih loh thu leh ruihhlo kengtu bakah ruihhlo neitu leh a tirtu te man chu an tum lian ber a nih thu a sawi a, mi engemaw zat ruihhlo neitu man an nih tawh thu a sawi bawk. Pu Victor Zothansanga, Addl. SP chuan lawmthu sawiin hun a khar a, heng ruihhlo mante hi Champhai District Bawrhsap leh SP te’n an halral nghal a ni. International Day Against Drugs Abuse and Illicit Trafficking denchhena ruihhlo halral tak te hi Champhai Police te’n June 2024 atanga April 2025 chhunga ruihhlo an man, Court in halral tura phalna a pek tawh te niin cheng vaibelchhe 117 nuaih 34 sang 5500 hu an halral a, Heroin Kg 24.841, cheng 7,45,23,00 hu, Methamphetamine Kg 249.125, cheng 32,38,62,500 hu, Crystal Methamphetamine Kg 25.834, cheng 77,50,20,00 hu te halral a ni.
Champhai Police te hian kum 2024 chhung khan ND&PS Act tlawhchhanin thubuai 172 an ziaklut a, mi 221 manin an zinga mi 39 chu rampawn (Myanmar) mi an ni. Champhai Police te hian kum 2024 chhung khan heroin Kg 47.107, Methamphetamine Kg 206.312, Crystal Meth Kg 34.115 leh Ganja Kg 27 te an man a, kumin kum 2025 January thla atanga vawiin thleng khan ND&PS Act. tlawhchhanin thubuai 84 an ziaklut a, mi 144 man niin an zinga mi 26 te chu ramdang mi (Myanmar) an ni thung. Kum 2025 chhung hian Heroin Kg 18.570, Methamphetamine Kg 458.698 leh Crystal Meth Kg 5.169te an man tawh a ni.
