Mizoram thingtlangte faina lama an dinhmun endik tura inbuatsaih a ni
Vawiin khan India rampum huapa Swachh Bharat Mission (Grameen) hnuaia thingtlang khaw 21,000 te endikna tur, Swachh Survekshan Grameen (SSG), 2025 inhrilhhriatna hun State Level Workshop on Swachh Survekshan Grameen (SSG) chu Project Management Unit, PHED buatsaihin Conference Hall, Engineer-in-Chief Office-ah hun hman a ni a, endikna tura tehkhawng hrang hrang duante he hunah hian zirchianna hun hman nghal a ni. Sawrkar laipui remruat angin, Mizoram thingtlangte faina lama an dinhmun endikna hi independent agency, Academy of Management Studies (AMS) te nen ṭangkawpa neih tur a ni a, ruahman danin faina lama Mizoram dinhmun endikna hun hi June thla ni 21, 2025 atanga neih ṭan tura ruahman a ni a, Mizoram khaw hrang hrangah a hmuna endikna hun neih tur a ni.
Workshop programme hi Er. K. Zohmingliana, Chief Engineer (Hqrs.), PHED chuan kaihruaiin, biak hmuh theihna (online) kaltlangin Dr. Suteena Choudary, Research Analyst, Academy of Management Studies (AMS) hnen aṭanga zirtirna ngaihthlak niin, endikna kalpui dan tur Dr. Lalpianpuii, Mizoram State Co-ordinator, AMS hovin zirhona leh sawihona hun neih nghal a ni bawk a, Er. H. Lalbiakhlua, Assistant Engineer, PMU, PHED leh Er. Lalchhuangliana, State Consultant, SBM(G) te pawn kum hmasa lama endikna kalpui a nih ṭhin dan leh SBM-G hmalakna hrang hrangte inhrilhhriatna hun an hmang bawk. He hun hi District lama SBM-G palai hrang hrangte leh SIRD palai ten an chhim a ni.
Mizoram thingtlang mipui zawng zawngten he hun hi ram hmel lanna hun a ni tih hria a, ṭha taka khual lo chhawn turin Project Management Unit, PHE Department hotute chuan an ngen a ni.
