Mgnregs chungchangah all mizoram village council association hruaitute leh rd minister inkawm

Vawiin chawhnu khan Prof. Lalnilawma, Minister, Rural Development & Administration Department leh All Mizoram Village Council Association hruaitute chu RD&A Minister pisaah inkawmna hun an hmang a. Mahatma Gandhi National Rural Employment Guarantee Scheme buaipui chungchanga Village Council member hnathawh dan te, Mizoram Village Council member-te hlawh ennawn chungchangte leh Village Council inrelbawlna hrang hrang ah Rural Development & Administration hmunhmate tangkai tak a hman a nih ve theihna tur an sawi ho a ni.

Prof. Lalnilawma, Minister, RD&A Department chuan Village Council hruaitute chu khawtlang tihhmasawnna tura mipui aiawh a thlan tlin an nih angin hmasawnna hna kalpuina kawnga hmanraw pawimawh tak an nih bakah endiktu leh viltu pawimawh tak an nih thu a sawi a. Khaw hrang hranga hmasawnna rotling siam a nih theih nana, ni 100 inhlawhna MGNREGS tha taka hlenchhuahna kawnga thawktu pawimawh tak an nih thu sawiin khawtlang leh ram tana an inpekna ah lawmthu a sawi.
RD & A Minister chuan All Mizoram Village Council Association hruaitute ngenna te chu khawtlang inkaihhruaina kawnga Village Council member-te thuam chak lehzualna tura thil pawimawh tak a nih thu a sawi a. RD&A Department piah lamah Department dangte nena inrawn khawm ngai a nih dawn avangin theihtawpa a bawhzui sak tur thu a sawi.

RD & A Minister kawmna hun ah hian AMVCA President Pu FP Laikhama leh VC hruaitu dangte an tel a. Ngenna hrang hrang an thlen zingah hian Aizawla Village Council Chawlhbuk sak te, Mizoram House hrang hranga VC member-te tana hmathatna siam sak te leh Village Council thar ten 15th Finance Commission hnuaia an huam chhunga hna an thawh ve theihna tura ngenna te a tel a. He hunah hian Village Council mawhphurhna dah pawimawh lehzual a ni theih nana VC dan ennawn leh siamthat a ni chu lawmawm an tih thu AMVCA hruaitute hian an tarlang a ni.