Saitual District-a high school naupangte tan eizawnna kawng inkawhhmuhna ‘career exhibition’ buatsaih
Vawiin khan the Educational and Vocational Guidance and Counselling Cell, Directorate of SCERT te chuan Saitual Auditorium-ah Saitual District-a high school 10 te tan eizawnna kawng inkawhhmuhna ‘career exhibition’ leh a tel zinga a tithate lawmman semna hun a buatsaih a, District Bawrhsap Dr. Lalngura Tlau chu khuallian niin he hun hi a hmanpui. He hunah hian khuallian Dr. Lalngura Tlau chuan thu a sawi a, SCERT hotute chu Saitual District zirlaite tana eizawnna kawng inkawhhmuhna programme pawimawh tak an buatsaih chu lawmawm a tih thu sawiin, zirlai naupang leh zirtirtu tel zawng zawng te pawh an thawhrimna fakawm a tih thu a sawi bawk.
Bawrhsap chuan zirna atan Saitual District hotuten theih tawp an chhuah tih sawiin, NEP 2020 hman hnuah zirna huam zau zawk “multi disciplinary education” kalpui tan a nih angin vocational training neihna atan Additional classroom sakna tur chu DEO leh DPC te pawhin scheme hrang hrang kal tlangin hma an la a ni, a ti. Dr. Lalngura Tlau chuan zirna chu mi zawng zawng tan a pawimawh a ni, a ti a, eng eizawnnaah pawh kal se high school chin chu an thiam a tha tih sawiin zirna sang zawk ‘higher education’ erawh zirna lama kal duh, mi tumruh leh tih tak takna nei te tan chauh a ni, a ti. Bawrhsap chuan zirlai naupangte chu an line zir chhunzawm tur thlang fimkhur turin a chah a, an thiante thlan ang thlang ve mai lo a an chhungkaw dinhmun thlir chunga an tuina leh nuam tih zawng thlang thiam turin a chah a ni. Bawrhsap chuan zirlai naupangte chu harsatna tam tak an la tawk dawn tih sawiin, beidawng loa tih tang tang peihna nen theih tawp chhuah zel turin a fuih a ni.
SCERT hian Career Exhibition hi tum engemaw zat zirlaite tan a lo buatsaih tawh a. He programme-in a tum ber chu zirlaite zirna sang zawk an zir zelna tur leh eizawnna kawng an zawh theihte kawhhmuha, mahni inhaikaw tura fuih leh tihphur a ni. Vawiin Career Exhibition buatsaihah hian school 10 telin, May ni 8, 2025 khan Pi Florence Lalrinpuii, Deputy Director hovin BRC Saitual ah Exhibition-a tel tur school Headmaster Ieh Guide Teacher te nen meeting neih a ni tawh a, programme hman dan tur kimchang rel niin, exhibition atana mamawh tur pawisa fai inhlan a ni bawk.
