EF&CC Minister Pu Lalthansanga hovin Thenzawlah Green Mizoram Day hmang
Vawiin khan Green Mizoram Day chu Mizoram pumah hman a ni a. A hmanna pui ber hi Thenzawl Golf Course ah neih niin Environment, Forests & Climate Change Minister Pu Lalthansanga, State Level Sub-Committee on Green Mizoram Day Chairman chu khuallian a ni. Kumin Green Mizoram Day thupui chu “Ruah tui khawl nan thing i phun ang u” tih a ni a. He ni pual hian Minister leh official dang ten thingtiak an phun a ni. Khuallian chuan Mizoram chhungah ram ngaw kan tihchereu nasat lutuk avangin tui hna a tlem tial tial a, kan pi leh puten sik leh sa an thliar dan pawh tunah chuan hman hleihtheih a ni ta lo; hei hi neitu thinlung pu loa mikhual ang maia kan ramngaw te kan enkawl vang a ni, a ti. Pu Lalthansanga chuan Green Mizoram Day hi rilru leh tihtakzetq hmang turin mipuite a chah a; thing leh mau leh nungchate te humhalh a, thingphun uar tur te, bawlhhlawh paih dan pawh fimkhur turin mipuite a fuih a ni.
Vawiin programme-ah hian EF&CC Minister Pu Lalthansang chuan kangmei venna kawnga district tithate hnenah lawmman a hlan a. District level-ah pakhatna dawngtu chu Lungei district an ni a, pahnihna Serchhip district leh pathumna Aizawl district an ni.Serchhip District chhunga kangmei venna kawnga tithate hnenah lawmman sem a ni bawk a. Lawmman pakhatna dawngtu chu Leng khua an ni a, pahnihna Zote South leh pathumna Ngentiang khua an ni.Ramsa leh nungcha humhalhna kawnga thawk tha te leh Mizorama thing leh mau tipung tura titha pawl hrang hrang te hnenah lawmman sem a ni bawk a. Zuchhip YMA, Sairep Village Community leh Serchhip Sub Hqrts YMA ten sumfai cheng 83,000 bakah waiting shed sakna tur an dawng a ni.
Green Mizoram Day hi Green Aizawl Day ti a bultanin, kum 1999 ah Green Mizoram Day tia thlak a ni a. Kum 2014 atang khan June ni 11 hi Green Mizoram Day atan Mizoram Sawrkar chuan a puang a ni. He ni denchhen hian Mizoram chhung hmun hrang hrangah thingtiak phun thin a ni a. Thingtiak nuai 46 chuang phun a lo ni tawh a ni.Vawiin programme ah hian Pu MZ Singson, IFS, CF (CC) chuan Green Mizoram Day report a pe a. Dr R Lalnunrenga, DFO chuan lawmthu sawiin hun hnung a khar a ni.
