Mizoram Larsap General (Dr) Vijay Kumar Singh, in National Workshop on AI-Driven Financial Empowerment for Mizoram a hawng
Mizoram Larsap General (Dr) Vijay Kumar Singh, Chief Rector, Mizoram University (MZU) chuan vawiin khan Department of Science & Technology, Govt. of India, MZU leh IBITF, IIT Bhilai tangkawp buatsaih ni hnih awh tur, ‘National Workshop on AI-Driven Financial Empowerment for Mizoram’ chu MZU Auditorium-ah Khuallian niin a hawng. Larsap hian Sawrkar laipui Department of Science and Technology hnuaia Tribal Area Sub Plan Scheme hmanga project leh entrepreneur tanpuina pekte tarlanna booklet a tlangzarh nghal bawk.
Khuallian Larsap General (Dr) Vijay Kumar Singh (Retd) chuan Artificial Intelligence tangkai taka hman a nih theih nana inzirtirna workshop buatsaih a ni chu lawmawm a tih thu sawiin, IIT Bhilai-in North Eastern Region tana Tribal Area Sub Plan Scheme hnuaia AI Driven Financial Technology Project 36 a kalpui zinga 11 (MZU 6 leh NIT 5) lai mai Mizorama kalpui a ni chu lawmawm a tih thu a sawi a. AI tangkaina chuan thingtlang kilkhawr zawka chengte thlengpha ngei se a duh thu sawiin, mithiam kalkhawmte chu mipui nawlpui tana hriatthiam awlsam leh tangkai taka hman theih tur ngaihtuah chunga hma la turin a chah a, Project Investigator leh Co-Project Investigator-te thawhrimna leh remhriatnate chu mipui tan vanneihna, hnathawh leh khawsak tiawlsamtu a la ni thuai dawn a ni, a ti bawk.
Larsap chuan AI hmangin tunhma lama thil tih theih loh leh mihring tana awlsam taka tih zung zung theih lohte hun reilote chhunga peihfel theih a nih thu sawiin, AI behchhan hmanruate hi financial inclusion leh literacy kalpui nana tangkai taka hman theih a ni a, entrepreneur, farmer leh thalaite bakah mipui nawlpuiin tangkai takin kan hmang thei a ni, a ti a. Digitisation lama tanlak a tul thu leh tha taka kalpui a tul thu pawh sawiin, hei hian langtlang, innghah ngamna leh rinawmna a kengtel a, eirukna nuai bo nana hmanraw pawimawh tak a ni, a ti a. Tribal Area Sub Plan Scheme hnuaia Sawrkar laipui hmalakna fakawm a tih thu sawiin, tribal area-a chengte tana technology lama hmasawnna thlentu, tichaktu leh sustainable development siamtu pawimawh tak a ni, a ti a. Tribal Area Sub Plan Scheme hnuaia Mizorama project kalpui 11 te chuan rah tha a chhuah ngei a beisei thu leh Mizoram tana danglamna leh hmasawnna thlentu a nih theih ngei a beisei thu a sawi bawk.
He huna tarlan a nih danin Department of Science and Technology (DST) kaihhruaina hnuaiah National Mission on Interdisciplinary Cyber-Physical Systems (NM-ICPS) chuan IIT Bhilai hnenah Technology Innovation Hub (TIH) host turin sum a pe a. Tunah hian IIT Bhilai hian Financial Technology huangah Mizoram University tan project 6 leh NIT Mizoram tan project 5 a ruahman a ni.
National Workshop on AI-Driven Financial Empowerment for Mizoram hawnna programme neihnaah hian NIT Mizoram hnuaia project pakhat, ‘Economic Optimization Platform for Public Transport System for Mizoram’ chu thlirho a ni a. Project Principal Investigator Dr. Lalhruaizela, Asst. Prof., CSE Dept., NIT Mizoram, Co-PI Dr. Sandeep K Das, Asst. Prof., CSE Dept., NIT Mizoram; Dr. K. Vanlalawmpuia, Asst. Prof., ECE Dept., NIT Mizoram leh Pi Esther Lalremruati, Scientist, MIRSAC-te buatsaih a ni a. He Mobile Application hmang hian Transport Department nena tang hovin Mizoram chhunga Taxi hrang hrang leh Autorickshaw-te online hmanga book theihna tur siam mek a ni a, hman theih tura peihfel thuai beisei a ni.
National Workshop hawnna hunah hian Workshop Coordinator Prof. Ajoy Kumar Khan, Dept. of Computer Engineering, MZU chuan inlawmna thu a sawi a. Khualzahawm Prof. Dibakar Chandra Deka, Vice Chancellor, MZU leh Pu Amit Sharma IAS, Secretary, ICT Department; Khualtha Er. Lalrammawia, Director, Transport Department; Prof. Pravakar Rath, Pro Vice Chancellor, MZU; Prof. Santosh Biswas, PD&Dean (R&D), IIT Bhilai leh Pu Vishnu Vaibhav Dwivedi, Chief Technical Officer, IBITF, IIT Bhilai te’n thu an sawi a. Workshop Joint Coordination Dr. R.Chawngsangpuii, Assoc. Prof., Department of Information Technology, MZU chuan lawmthu sawiin hun hman a khar a ni.
