ILP pekchhuah zinga a zatve aia tam hun pawhsei sak an ni
Nikum chhung khan inner line permit (ILP) pangngai 7,927 pek chhuah a ni a, ILP pek chhuah zinga mi 5,675-te chuan an an ILP hi tinungin pawhsei sak leh an ni. General administration department (GAD) hotute sawi danin nikum chhung khan temporary ILP mi nuai 1, sing 2, sang 9 leh 953 hnenah pekchhuah a ni a, pawhseisak an awm lova. Temporary stay ILP mi 238 hnena pek a ni bawk a. Kum 2 chhung nung chi ILP mi 18 hnena pek a ni bawk.
GAD hotute chuan Mizoram-a Inner Line Permit kalphung chu a tul anga en nawn a, changtlung zawka siam mek zel a ni tih an sawi a, District bawrhsapte’n Manual-a an pek thin Regular ILP leh kum 2 atana ILP pekte chu nikum November thla atang khan online-a pek a ni tawh a. Hemi hma hian kum 2023 atang khan temporary ILP leh rei lote hun chhung a Mizorama cham theihna (temporary stay permit)-te chu online-a pek tan a lo ni tawh bawk.
Heng online-a ILP pek chhuah te hi awlsam taka a tak leh a lem enfiah a nih theih na’n Information & Communication Technology Department-in mobile application an siam a. Hei hi tangkai taka hman a ni a. ILP inkaihhruaina hman mek pawh siam that tura ruahman mek a ni. Rel chawlhhmun awmna Bairabi khuaa ILP pekna atan ruahmanna thar a awm lo a. Amaherawhchu, ILP check point ah mobile application hmanga lo endik thin a ni.
