Serchhipah kum 2025 Thingtam sazu puang hrai beihpui thlak
Serchhip Joint Village Council leh District Agriculture Office, Serchhip Join meeting in a lo rel tawh angin kum 2025 Thingtam vanga Sazu puangin Buh leh thlai te an seh chhiat loh nan vawiin khan Serchhip Mat Phai zau hrang hrang Sazu Puang hrai beihpui thlak a ni. Serchhip Joint Village Council leh District Agriculture Office tangkawp hian Zawlpui, Chawm, Chamdur, Thliarpui, Lumtui, Tuichar, Zuangleng, Zehtet,Thuhruk, Lungbu, Luitedam, Tuisen, Lathei ah Serchhip FMC te nen an hnatlang a ni.
He hunah ah hian DAO Pu Lalchharliana chuan Thingtam vanga Sazu puang tur laka inven a pawimawhna te, Sazu kan hrai pawh a fumkhur a ngaih zia te a sawi a, VC leh Loneitute nen kan thawhhona a that vangin kan hlawhtling ngei ang, a ti a. Sazu puang vanga harsatna kan tawh tur pawh a ziaawm ngei a beisei thu a sawi. Pu R Sanghmingthanga, Chairman, Joint VC, Serchhip pawhin thu sawiin Sazu hrai tur hian kan vaia thawhho loh chuan a hrai ve lo Zau pakhat vangin kan tuar vek thei a ni, a ti a. Hetianga thuawi taka hma kan la tlang hi a lawmawm hle a ni a ti.
Sazu hrai hlum tak te hi naktukahah senghawi leh vek a, Sazu thi te chu Phum vek a ni dawn a. Sazu sa ei thinte pawh fimkhur tur leh Sazu mana zuar thin te pawh fimkhur turin an inchah bawk a ni. Pu Lalrinzuala, ADAO, Serchhip in Sazu tur hman dan leh hrai dan, sawngbawl dan loneitute a zirtir a. Sazu tur a hmunah siam nghalin, loneituten a ruala an hrai theih nan Sazu tur siam sa sem nghal vek a ni bawk.
