Serchhip ICDS Project leh DPO Office-in vantlang hmun an tifai
8th RASHTRIYA POSHAN MAAH hmanna kalzel ah vawiin khan Serchhip ICDS Project leh DPO Office te chuan Serchhip Sailiam thlang tawngtaina hmuna hnawmhnawk chi hrang hrang an thianfai.
ICDS Project leh DPO Office -a thawktute hian hnatlangpui – ‘Cleanup drive of plastic waste material at public area’ neiin hmun bawlhhlawh leh tawp lai an thianfai a. He hun hi Serchhip khawchhunga WCD Department a thawktu hrang te nen hmangin mi 30 lai an thawkchhuak a ni. Hnawmhnawk lak khawm te hi LAD bawlhlawh paihna hmunah paih nghal vek an ni bawk.
October 16 thlenga neih tur Rashtriya Poshan Maah hi Serchhip ICDS Project leh DPO te hian ruahmanna siamin naupangte leh nu naupai te mai bakah tleirawl te thlenga ei leh in tha a pawimawhzia inzirtirnan te, naupang hrisel taka an than len theihnana inzirtirna mai piah lamah khawtlang tana thil tha tih nan an hmang a ni.
