School enrolment pung hnenah lawmman pe
Adviser to CM, Pu TBC Lalvenchhunga, Aizawl West I bialtu ni bawk chuan a bial chhunga school enrolment pung tam ber te hnenah a MLA fund atanga lawmman a pe. Lawmman hlanna inkhawm hi ama office-ah buatsaih. Pu TBC Lalvenchhunga chuan Aizawl West I huam chhunga sawrkar Middle school leh Primary school te enrollment kum hmasa lam atanga teha kumin academic year-a, zirlai enrolment pung tam ber te hnenah a MLA fund atangin nuai khat ve ve a pe a ni. Lawmman a siam chhan sawifiahin, a bial chhunga zirtirtute inkarah inelna thianghlim awm se a duh thu te, naupang school kal lo te huikhawm a, school kal tir tura zirtirtute an tan theih nan te leh sawrkar school, a phu tak tak ten in inthawmthatna an neih theih nan a buatsaih thu a sawi.
Adviser to CM chuan, school enrolment intihsiakna chu, kum hmasa academic year tawp dawnin Education Dept kaltlangin school intihsiakna anga neih a nih tur thu school tin te hnenah thehdarh a ni tih a sawi a. Lawmman dawng tur pawh hi Education Dept admission information hmanga duan a nih thu a sawi a ni. Aizawl West I bial chhungah hian Primary school zing-ah ‘Govt. Primary School II, Sairang’ in 24% enrolment punna neiin cheng nuai khat hi an dawng a; middle school zingah enrolment punna 50% neiin ‘Govt. Middle School-II, Tanhril’ in lawmawm hi an la bawk a ni.
Vawiin programme hi Adviser to CM chamber ah neih niin. Aizawl West SDEO leh official dang ten telpui in, School Management Committee te leh khawtlang hruaitute an tel bawk a ni. He hunah hian Pi Carolyn Rinthanpuii Fanai, SDEO chuan Aizawl West I bialtu in a bial chhunga school te hmasawn nan a pui nasa tih sawi langin, zirtirtute tiphur thei tura school titha te lawmman a pek thin chu a lawmawm a tih thu a sawi bawk a ni.
