Saitualah Economics & Statistics Director-in District Research Office Building thar a hawng
Vawiin khan District Research Office Saitual District, Building thar Keifang Venghlun a mi chu Economics & Statistics Director Pu B.Lalrinhlua’n a hawng. He hunah hian Director Pu B. Lalrinhlua chuan thu sawiin, Economics & Statistics Department-a thawktute an vannei hle tih a sawi a, tun hnaiah Directorate leh District Office-a thawk te chuan hmasawnna hrang hrang an hmuh thei a ni tih a sawi. Director chuan district 11 a office nei thei hmasa ber an nih hial a rin thu sawiin, an hotute kaihruaina hnuaiah district thar pathum (3) Khawzawl, Hnahthial leh Saitualah Office hawng turin theih tawpin hma an la a, sawrkar hruaitu, a hmun petu VC te, a hnathawktu PWD, Contractor, Directorate E&S thawkte te leh DRO Office thawkte avangin Office an hawng thei ta chu an zavaia tanrualna vang a ni, a ti.
Pu B. Lalrinhlua chuan Office-a kan hna chanpual theuh tha takin kan thawk mai tur a ni a, hruaitu leh hotu an nihna zawnah theuh inzahtawn thiam a pawimawh tih sawiin, Office hrang hrangah thu nawi nei an awm thin chu tha lo a tih thu leh hetiang awmlo tura an department pawhin theih tawp a hma an lak tur thu a sawi bawk. Director chuan department changtlun nan hmalakna tur hrang hrang an neih te tarlangin, DRO Office changtlunna tura hna thawh turte pawh theih tawp chhuah turin a chah nghal a ni. District Research Office hawn thar tak chu Saitual District Statistics dik tak changtlunna tura inpui lo nise a duh thu te, statistics dik tak behchhan tlak nei tura ram hruaitute nawr thiam a ngaih thu leh ram hmasawnna leh changtlunna atan a hman tangkai theih tur statistic dik leh rin tlak nei tura theihtawp chhuah tlan a pawimawh thu Director chuan a sawi bawk a ni. Technical Report a tarlan danin DRO Office building hi cheng nuai 70 senga sak a ni a, Building hi District Research Officers’ Quarter, Staff cum Chowkidar Quarter atan a ruahman, chhawng thum a sak a ni a, a zau zawng hi Basement floor 39.002 sqm, ground floor 104.749 Sqm, first floor 104.749 Sqm leh mumty 8.889 Sqm Total Floor Area 257.389Sqm a ni a, 9.9.2022 ah hna thawh tan niin 9.4.2025 ah sak zawh a ni. Saitual District Research Office hi March 26, 2021 ah hawn a ni a, Tun dinhmunah DRO leh Staff 4, thawktu 5 an awm mek a ni.
Vawiin office hawnna inkhawm hi Joint Director Pi Mary Lalrinchhungi Economics & Statistics-in kaihruaiin an department inrelbawlna chungchang sawi zauna a nei a, hunserh hi Capt.Lalhmasanga Bialtu CO Salvation Army in a hmang a, SDO Er. K.Chawngzika’n technical report a pe a, DRO Saitual Pu Lalnghinglova leh kalkhawmte atangin thusawi ngaihthlak a ni a, Deputy Director Pi B. Vanlalrengi chuan lawmthu sawiin hun a khar a ni. Hun hmannaah hian Directorate Economics & Statistics a thawkte, DRO Aizawl, Khawzawl, Champhai, Saituala thawkte bakah sawm bik ten hun an hmanpui a ni.
