POWER & ELECTRICITY MINISTER HOVIN CERC REGULATION 2022 LEH POWER SUPPLY LOAD SHEDDING CHUNCHANG SAWI HO A NI
Vawiin khan Power & Electricity Minister Pu F Rodingliana hovin, a pisaah Power Supply Load Shedding kalpui thin dan leh hemi kaihhnawih Central Electricity Regulatory Commission (Ancillary Services) 2022 kalpui dan tur sawi hovin thutkhawm a ni a. Pu TBC Lalvenchhunga, Adviser to CM (Finance), P&E Department Official-te, Law & Judicial Department leh Finance Department aiawhte an tel a ni. He thutkhawm ah hian load shedding kalpui a ngaih chhan tarlan niin, Mizoramin power a hmuhna pui ber Tuirial Hydel Power Station atanga power lakna, 132kV line ah harsatna a awm changin kan power mamawh (demand) phuhru turin hmun dang (Generating Station) atangin ruahman (schedule) sa ni lo power lak luh ‘overdraw’ a ngaih thin thu tarlan a ni a. Overdrawal, ruahman sa ni lo atanga lak hi tih a nih loh chuan power mamawh zat kan hmuh theih loh avangin load shedding kalpui a ngai ta thin, tih sawi a ni. Tuirial Hydel Power atanga kawlphetha lakna line dang, Tuirial 2nd Evacuation Line siam mek ni mah se, zawh a la nih loh avangin harsatna hi a awm phah ta thin tih thu meeting-ah hian tarlan a ni.
Central Electricity Regulatory Commission chuan Indian Electricity Act 2003 in thuneihna a pek angin CERC (Ancillary Services) Regulation 2022 a duang chhuak a. He Regulation hian, eng State pawhin National GRID atanga a power dawn tur bituk (schedule) aia tam a (overdraw) la a nih chuan a overdraw-na zat (quantum) hi a rang thei ang berin Grid-ah chhung lut (recover) nghal turin a ti a ni. Hemi atan hian State tin te chu kum 2026-27 atang chuan reserve power nei turin a ti a, an reserve neih zat tur pawh a hma kum a an overdraw zat (quantum) atangin National Load Despatch Centre (NLDC) in a chhut sak vek dawn a ni. Kum 2024 chhunga kan overdraw atanga chhutin Mizoramin reserved power a neih ngai zat chu 75 MW a ni a. Hemi atanga a lan dan chuan kum tin Rs. 75.6 Crore vel sen belh a ngai dawn tihna a ni. Kum 2026-2027 a power reserve kan leina senso tur chu tun kum kal lai mek 2025 a kan overdraw quantum atangin chhut a ni ang. Chutihlai chuan ‘overdrawal’ tih avangin Mizoram Sawrkar in August 2025 chhung chauha a pawisa a chawi (penalty) hi Cheng Nuai 85 chuang a ni thung.
Heng harsatna te pumpelh tur hian State chhunga tharchhuah ngei power hmanga intodelh a tul zia he meeting-ah hian tarlan niin chumi atan chuan Mizoram Sawrkarin Hydel Project thar a buaipui mek Megawatt 132 tharchhuak thei tur Tuivai Hydel Project pawh nasa zawka bawhzui tura rel a ni. Tin, Tuivai Hydel Project hi a tirah Public-Private-Partnership(PPP) mode a tih tum ni mahse Mizoram Sawrkar ta liau liau a nih theih nan a tul anga bawhzui tura rel a ni.
