Mslsa-in nd&ps act hnuaia case buaipui dan tur sop an tlangzarh
Vawiin khan Mizoram State Legal Services Authority (MSLSA) chuan The Narcotics and Psychotropic Substances Act (NDPS Act), 1985 hnuaia ruihhlo siam, zawrh, hralh leh hman sual kaihhnawih thubuai kalpui dan inkaihhruaina bu, ‘Bi- lingual Standard Operating Procedure and Flowchart under the ND&PS Act, 1985’ tlangzarhna hun chu RB McCabe Hall, Aijal Club-ah an hmang a. He tlangzarhna hun hi Justice Michael Zothankhuma, Gauhati High Court Judge, MSLSA Executive Chairman ni bawk chuan hmanpuiin, SOP leh Flow Chart-te a tlangzarh a ni.
Justice Michael Zothankhuma chuan dan lova ruihhlo tawlhrukna kalkawnga Mizoram hman a ni chu Mizote tan leh kan thenawm ramte tan a pawi thu sawiin, MSLSA-in NDPS Act hnuaia ruihhlo man leh indap dan kalhmang zui tur inzirtirna bu fel tak a siam chu a lawmawm a tih thu a sawi a. Dan tha tak awm mah se a bawhchhetuten relhruk theih dan an zawng reng a, chuvangin dan hre mite pawhin inzirna atana hmanga, dan relhruk theihna lai kar awlte hnawhkhah tum a tul a ni, a ti. MSLSA Executive Chairman chuan Mizoram-a ruihhlo man a nih zin dan en chuan NDPS Court pakhat aia tam mamawh a nih thu leh Central Jail pawh tihchangtlun a ngaih thu a tarlang bawk a ni.
Thu sawitu dang, Justice Nelson Sailo, Gauhati High Court Judge, High Court Legal Services Commitee, Gauhati High Court (Aizawl Bench) Chairman pawhin ruihhlo man kawnga department hrang hrangte hnathawh chu lawmawm a tih thu sawiin, hetiang kaihhnawiha mante chu ND&PS Act hnuaia kalhmang siamte zawm a nih loh chuan court-ah chhuah leh theih an nih avangin he dan hi hriatchian a ngai tih a sawi a. MSLSA siam, SOP booklet leh flow chart chu tangkai taka hman a nih theih nan duhsakna a hlan a ni.
Justice Marli Vankung, Gauhati Hight Court Judge pawhin ruihhlo chu khawtlang chawk buaitu leh thalaite suattu a ni a, vawiina tlangzarh tak, ND&PS SOP booklet chu kan ram siamthatna hmanrua a nih ngei theih a beisei thu sawiin, he dan hnuaia pawimawh zualte a tarlang bawk a ni.
SOP tlangzarhna hunah hian Mizoram Judicial Services, Mizoram Bar Association, Police Department, Excise and Narcotics Department, Custom Department atangin mi thahnem tak an tel a. He hunah hian Pu Vincent Lalrokima, MSLSA Member Secretary chuan kalkhawmte lawmna thu sawiin, Pu Lalngaihmawia Zote, Addl. District & Sessions Judge, Aizawl atangin SOP chanchin tlangpui ngaihthlak a ni a. Pi Helen Dawngliani, District & Sessions Judge-cum-Chairman of DLSA, Aizawl Judicial District chuan lawmthu sawiin hun a khar a ni.
SOP tlangzarhna hun hman zawhah hian Pu Lalrinpuia Varte, SP, Narcotics leh Pu Peter Zohmingthanga, Joint Commissioner, Excise & Narcotics Department kaihhruaina hnuaiah Training of Trainers neih leh a ni bawk.
