Minister Pu Lalnghinglova Hmar-i’n Sairang kawng hluihlawn tawh enfiah
Tukin khan Aizawl West II Bialtu Minister Pu Lalnghinglova Hmar chuan Sairang kawng hluihlawn tawh enfiahin Khawtlang hruaitute nen inkawmhona Zohnuaiah a hmang a. Minister hi Pu B. Lalchhanzova Land Revenue & Settlement Department Minister, Pu TBC Lalvenchhunga Adviser to CM (Finance), Pu Lalmuanpuia Punte, Adviser to CM (Political) leh Vaivakawn Local Council aiawh te, bakah PWD leh Revenue Department aiawh ten an tawiawm a ni.
Bialtu Minister chuan khawthlang lamin kawng tha an neih a pawimawh zia a sawi a, tunah chuan Airport mai ni lovin, Rel lo lut hian a hma aia nasa leh zualin Sairang kawng a tihlun thu sawiin, Sairang kawng hluihlawn tawh chu leimin leh chhan dang vanga tuna kan kawng neih chhun a pin chang pawha awlsam taka hêlna tur a nih thu te leh Vaivakawn traffic jam nasa lutuk ṭhin pawh a tih ziaawm theih a beisei thu a sawi a ni.Pu B. Lalchhanzova, Land Revenue & Settlement Department Minister chuan thu sawiin, Infrastructure kan din hian a hlawhtlinna tak tak hmuh nan hian hun a duh rei ṭhin em em a, chutiang ni lovin tukina kan en fiah erawh hi chu road map fel tak nen kum 2 ral hmaa puitlin hman theih nise a duh thu a sawi a, Revenue & Settlement Department chuan a ṭul angin hma theih tawp an lo lakpui tur thu a sawi.
Pu TBC Lalvenchhunga Adviser to CM (Finance) leh Pu Lalmuanpuia Punte, Hrangtûrzo Bialtu MLA, te pawh in thu sawiin, anmahni zawnah tangkai theihna an nei a nih chuan phur taka hma an lakpui tur thu an sawi.He hunah hian kalkhawm te chuan a rang lama PWD in Road alignment lo ti tur leh Revenue Department pawh in Survey te lo nei turin an ti a, sum mamawh turte lo buaipui turin Pu TBC Lalvenchhunga Adviser to CM (Finance) ruat a ni.Pu Lalchawimawia LC chairman, Vaivakawn chuan hun hmasa lam aṭang tawh in helai kawng hi enfiah lo ni ve tawh ṭhin mahse a tak a hmalak ani ngai lem lova, tun sorkar in an ngaipawimawh chu lawmawm a tih thu a sawi bawk.
