Minister Pu Lalnghinglova Hmar-in New Age Technology Lab hawng

Vawin khan Industrial Training Institute (ITI), Aizawl-ah LESDE Minister Pu Lalnghinglova Hmar chuan New Age Technology Skill Lab a hawng. Skill Lab hawnna inkhawmah hian Adviser to CM & CSR Cell Chairman Pu TBC Lalvenchhunga chu special guest niin, Bharat Forage Vice President & Head CSR Pi Dr. Leena Deshpande chu khualzahawm a ni.

Skill Lab hawnna inkhawmah hian khuallian chuan thu sawiin, Bharat Forge-te nen thawkhova New Age Technologies zirna Skill Lab an din chu lawmawm a tih thu leh Mizoten an țangkaipui ngei a beisei thu a sawi a, thawhhona tha chuan thil tam tak a thlen thei a, skill lab hawn a nih theih chhan pawh thawhhona tha tak a awm vang a ni, a ti. Mizoram tan hmasawnna a nih ngei a beisei thu sawiin, hei hian zirna hi a thlak danglam thei dawn a ni, a ti bawk.

Minister chuan thiam bik (skill) neih a pawimawh thu sawiin, mi tam tak chu lehkha zirna lamah sang tak thleng thei lo mah se, thiam bik an neih chuan eizawnna atan a hman theih thu sawiin, ITI chu chutiang atan chuan a pawimawh hle a ni, a ti a. Skill lab bungrua tha tak tak hmang hian thiamna tha tak tak nei an chher chhuah zel a beisei thu a sawi bawk a ni.

Minister chuan khawvel hmasawn ang zela thiamna pawh inher rem ve zel a pawimawh thu sawiin, skill lab technology chuan zirlaite chu khawvel hmasawnna ruala thiamna nei ve thei turin a puih tur thu a sawi. Skill lab thara khawl tha tak tak- PLC Automation , drone technology, Weilding simulator, 3D printing leh Electrical simulation te chuan zirlaite chu thiamna sang zawng leh hmasawnna tha zawk a pek theih ngei a beisei thu sawi bawk a ni.

Minister chuan Mizoram sawrkarin ITI a ngaihpawimawh thu sawiin, SASCI hnuaiah ITI, Aizawl tih changtlungna tur cheng vaibelche 25 dah a nih thu te, Bana Kaih scheme hnuaiah cheng vaibelchhe 2 chu Aizawl, Lunglei leh Siaha-a ITI te thawmthatna atan dah a nih thu te leh PM-SETU hnuaih hmalakna an neih thu a sawi bawk a ni. Kalkhawmte chu skill lab hawn thar chu chhawr thei tur khawpa taima turin a fuih a, Mizoram hmasawnna meichher kengtu te an nih thu a sawi bawk a ni.

Pu TBC Lalvenchhunga pawhin thu sawiin, skill lab tha tak mai Mizoramin a nei thei chu lawmawm a tih thu sawiin, zirlaite chu an vanneihzia hria a, theihtawp chhuah turin a fuih a, thiamna rintlak zirchhuahpui ngei turin a chah a. Bharat Forge te nen thawk hova hetiang technology zirna skill Lab din a lo ni ta chu lawmawm a tih thu leh roh taka enkawl tura a duh thu sawiin zirlaiten țangkaipui ngei tura a duhsak thu a sawi bawk.

Khualzahawm Bharat Forge Vice President & CSR Head, Dr Leena Deshpande pawhin thu a sawi a, Bharat forge chu thilsiamtu industry a nih thu te, khawl chi hrang hrang part lirthei leh thlawhna thlenga siamtu a nih thu te, hmun hrang hranga hna an thawh dan leh hmachhawp te a sawi bawk a ni. SimuSoft Technologies Sr. Project Manager, Pu Shrikant Karbhari hnen atang SimuSoft hnathawh dan leh khawl hrang hrang te hnahthawh dan ngaihthlak a ni bawk.

Mizoram sorkar leh Bharat Forge te chuan thawk dunin CSR kaltlangin he Technologies Lab hi an din a, Bharat Forge hnuai atang hian Simusoft Technologies te chuan Skill Lab din hna an thawk a, software hmanga Robot khawl chi hrang hrang hnathawk thei tura design dan zirna a ni. Industry lian tak taka khawl hmanga hna an thawh dan te, mamawh dan a zira khawl siam dan turte he skill lab atang hian an zir dawn a ni.