Minister Pu C. Lalsawivunga hovin Champhaiah Sapthei chin khuhhawnna neih a ni
Vawiin khan MIDH Special Intervention hnuaia Sapthei chin khuhhawnna chu Conservator of Forest Auditorium, Champhai Bethel Vengah neih a ni a, Horticulture Minister Pu C. Lalsawivunga chuan khuallian niin a hmanpui a, Horticulture Department Director Pu C.H. Lalmuanpuia’n hun a kaihruai a ni.
Khuallian Pu C. Lalsawivunga chuan Champhai District-ah MIDH Special Intervention hmanga Sapthei chin khuhhawnna neih a ni chu lawmawm a tih thu a sawi a, sorkarin kut hnathawktute a ngai pawimawh hle a, kut hnathawktute intodelhna atana hmalakna tangkai tak a nih a beisei thu a sawi. Kut hnathawktute chu fuihin tun hun mai ni lo tu leh kan fate zel in an chhawr a, an lo intodelh a kan ram kan hnam a lo din chhuah theihna turin an hmalakna turah rinawmna leh taimakna nen thahnem ngai taka thawk turin kalkhawm te chu a sawm. Kan ramin harsatna tawh mek sual hrang hrang laka inthiarfihlim a, kan ram a lo din chhuahna tura thahnem ngai taka hnathawka thlai thar tam tak thar chhuak turin duhsakna a hlan a ni. Minister chuan kut hnathawktute hnenah MIDH Special Intervention hnuaia hamthatna te a sem bawk a ni.
Sapthei chin khuhhawnaah hian hian KVIB Charman Pu C. Lalremliana leh MIFCO Chairman Pu Lalthazuala Rawite te’n thu an sawi bawk a, DHO Pi Lalrinchhani’n lawthu sawiin hun a khar a ni. Champhai Bawrhsap Pu Mohammad Aaquib, Sorkar official te leh kuthnathawktu te an tel bawk a ni.
India ram State dangah chin tam loh Sapthei hi Mizoram leilung, sik leh sa nen inmil tak a nih avangin District thlan bik Aizawl, Serchhip, Khawzawl leh Champhai ah te Sorkar chuan Sapthei chin kawngah nasa takin hma a la mek a. Champhai leh a chhehvel hi a zo boruak a ngeih avangin tun hma atangin sapthei hi chin thin a ni a, tunah hian MIDH Special Intervention hmangin Horticulture Department chuan khaw thlan bik – Vaphai, Samthang, Hnahlan, Ngur, Champhai, Hmunhmeltha leh Ruantlangah te hian hma lak pui turin chhungkaw 150 thlang chhuakin hma an lakpui mek a ni. June thla khan sapthei chin dan, enkawl zui dan leh Sapthei chinna hmanraw hman dan tur zirtirna an lo pe tawh bawk a ni. Sapthei ching tur thlan te hnenah hian Sapthei țiak, Sapthei zamna hrui, Organic lei tha, NPK, a zamna tur banril, a natna enkawlna damdawi, wood vinegar, a kahna (Sprayer), a tang tanna (secateur) te thlawnin an pe a ni.
Champhai chhehvela sapthei tharte sawngbawlna turin Passion fruit Processing Unit, Cold Storage Complex under NEC Zote daiah sak peih tawh a ni a, a khawl leh hmanraw țul dangte dah turin buaipui mek a ni bawk.
