Lungsenah Project LEAP hnuaiah vohbikte tan health assessment camp buatsaih a ni
Lunglei District Bawrhsap hma laknaa Lunglei District-a vohbikte chawi kanna tur ruahmanna – Project LEAP (Lunglei’s Empowerment for Access and Equity for all Persons), Healthy Lunglei District Campaign leh Nasha Mukt Bharat Abhiyan hnuaiah vawiin khan Lungsen Primary Health Centre-ah vohbikte hriselna dinhmun endikna, health assessment camp buatsaih a ni.
Lungsen Block Development Officer Pu Lalhruailiana Zote chuan health assessment camp hawnna thu sawiin, vohbikte’n sawrkar aṭanga hamṭhatna leh an chanvo an hmuh theih nan Unique Disability Identity (UDID) card an neih a ṭul thu leh District Bawrhsap hma laknain vohbikte chawi kanna tur ruahmanna hrang hrang kalpui a nih thu a sawi a. Lungsena health assessment camp buatsaih tura thawk chhuak medical team leh social welfare-a thawktute chungah lawm thu a sawi bawk.
Civil Hospital Lunglei aṭangin Sr Speciallist (Ortho) Dr Joseph Lalrindika Chawngthu hovin Audiologist, Clinical Psychologist leh Opthalmic Assistant te bakah, Social Welfare-a thawktu te’n Lungsenah hian kal chilhin, camp pantute hi an endik a. Lungsen Block chhunga khaw hrang hrang aṭangin vohbik mi 60 inentirin, an dinhmun endik a nih bakah, an zinga mi 52 chu UDID card siamsak turin UDID portal-ah thun nghal an ni a. ALIMCO aṭanga ṭanpuina hmanraw chi hrang hrang – wheelchair, bengdar, mitdel tiang, zakdawh tiang leh hmanraw dang dilsak turte pawh chhinchhiah nghal niin, health assessment camp pantu vohbikte hi an veivahna senso tumsak an ni bawk.
