Lawngtlai bawrhsap leh superintendent of police ten operation jericho bawhzuiin tuichhak tlangdung fang
Vawiin khan Pu Donny Lalruatsanga, Lawngtlai Bawrhsap leh Pu PC Lalchunglura, Superintendent of Police, Lawngtlai te chuan ‘Operation Jericho’ bawhzuiin tuichhak tlangdunga ‘duty post’ an fang a. Khawtlang hruaitu- VC leh YLA,LWA ten an lo dawngsawng a ni. Pu Donny Lalruatsanga chuan ‘Operation Jericho’ hlawhtlinna tura thawktu zawng zawngte chungah lawmthu a sawi a. Ruihhlo do kawngah ram leh hnam tana theihtawp chhuah an ni tih inriaa, thahnem ngai taka thawk zel turin a fuih a. A bik takin sum leh pai bakah hmanrua indaihlohna a hriatthiampui tih tarlangin, Mizoram sawrkara Home Department – ah pawh thlen tawh a ni, a ti . Mamawh an neih ang angte chu a hnena lo thleng zel tura chahin, theihtawp chhuah zel a nih tur thu a tarlang a. Mizoram nuam leh chhenfakawm zawk siam tura Ruihhlo do a pawimawh takzet tih sawiin, theihtawp chhuah zel turin a sawm nghal bawk.
Pu PC Lalchunglura, chuan Police te leh NGO- inpekna fakawm a tih thu a tarlang a. Harsatna tam tak an tawk thin tih a hriatthiampui tih sawiin, an harsatnate chingel tura chak taka hmalak mek a nih thu a sawi a. Ruihhlo do kawngah tangho a tul tak zet tih sawiin, theihtawp chhuaha thawkho zel turin a ngen a ni. Operation Jericho – bawhzui hian Tlangpui Duty Check Gate, Siachangkawn Duty Check Gate, te tlawh niin; duty- te mamawh bungrua leh pawisafai hlan nghal an ni. Operation Jericho puala Duty – te chuan harsatna an neih hrang hrang te an lo thlen a. Bawrhsap leh SP chuan an harsatnate an hriatthiampui tih tarlangin, a bik takin motor indaihlohna chu chingfel hmasak a nih tur thu an sawi a. Duty- ten mamawh hrang hrang an neihte ngaihtuah a nih tur thu tarlangin, Bawrhsap chuan khawtlang anga mamawh an neihte pawh ngaihtuahpui a tum thu a sawi bawk.
Operation Jericho- hi ni 13 October, 2025 atanga ni 31, December, 2025 thleng awh tur a ni a, he Operation – ah hian Police, Excise & Narcotic, CYLA, YLA Sangau Sub Headquarters, YLA Bualpui Sub Headquarters, Executive Magistrate, MHIP, LWA, MJA, Eastern Zone VC, 3rd IR leh 34 AR- te an awm a ni. Deputy Commissioner (DC) leh Superintendent of Police (SP) te hi Pu Thomas Maratha Hlychho, BDO, Sangau, leh Pu Lalrindika, SDC, ten an tawiawm a ni.
