LAWNGTLAI BAWRHSAP LEH CYLA HRUAITUTE INKAWM
Vawiin khan Pu Donny Lalruatsanga, Lawngtlai Bawrhsap, chuan Central Young Lai Association- hruaitute a Office Chamber- ah a kawm. Pu Donny Lalruatsanga chuan Lawngtlai District – a Tlawmngai pawl lian ber ‘Young Lai Association’ hmalakna leh hnathawh chhuanawm a tih thu sawiin, Zirna, Ruihhlo do, Hriselna, Khawpui nunphung, Faina leh thianghlimna, bakah Raltlan chungchang leh a kaihhnawihah te Young Lai Association leh Sawrkarin thawhhona thatak an neih thin chu chhawmnun zel a pawimawh tih a tarlang a . Hmalam hunah pawh thawkho zel tur leh infinchhuah an ngaihnaah Central YLA hruaitute chu neitu chanchang tlat turin a ngên nghal bawk.
Central YLA hruaitute chuan kawng hrang hranga Lawngtlai District hmasawnna leh venhim kawnga hma an lak tawh dan leh an lak mek dan te Bawrhsap hi an hrilh a. Ruihhlo do bik ah CYLA chuan Kumpuan atan Ruihhlo Do an kalpui mek thute, CYLA hmalakna vangin pawikhawihna thlakhniam thute, a bik takin Myanmar leh Bangladesh- nen ramri thuitak intawm an nihnaah tha thlah lova nasa zawka hmalak tul an tih thu te, Zirna siamtha tura hma an lakdan te, District Hospital Lawngtlai leh District chhunga PHC leh Sub Centre- ah te thawktu an indaihloh nasat ziate Bawrhsap hi an hrilh a ni.
Lawngtlai khawpuiah Raltlan Camp – 13 a awm thu leh Raltlan te chhawmdawl nan theihtawp an chhuah thin thu te an sawi bakah, Raltlan nilo, Ramdangmi rawn lutte mumal zawka chhinchhiah an nih theih nan Sawrkarin ‘Check Point’ siam se an duh thu te an sawi lang bawk. Central Young Lai Association hruaitute chuan kawng hrang hrangah Lawngtlai District- in hmasawnna a neih theih nan Sawrkar thawhpui an inhuam reng thu an sawi bawk.Pu Donny Lalruatsanga, Lawngtlai Bawrhsap chuan hmalakna tur an sawiho zinga District- a bawhzui nghal theihte chu Central YLA nen inrawn tlanga bawhzui a duh thu tarlangin, Thuneitu dang leh Thuneitu sang zawka thlen ngaite pawh lo thlen a tum thu a sawi bawk a ni.
