Larsap-in Mizoram aiawha Viksit Bharat Young Leaders Dialogue 2026 a tel turte a kawm
Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Viksit Bharat Young Leaders Dialogue (VBYLD) 2026-a Mizoram aiawha tel tur thalai 14 leh official-te chu Durbar Hall, Lok Bhavan-ah kawmin duhsakna nen a thlah. Larsap General (Dr) Vijay Kumar Singh chuan Mizoramin hma sawn turin kawng hrang hranga theihna nasa tak a neih thu sawiin, Viksit Bharat Young Leaders Dialogue, 2026 a Mizoram aiawh turte pawh heng zinga mi, an thiamna leh theihna atanga teha thlan chhuahte an nih thu a sawi a.
Mizoram aiawha ram pum huap intihsiaknaa tel tur an nih avangin tha taka inpuahchaha, chak duhna rilru pu chunga inrintawkna nena intihsiakna hmachhawn turin a fuih a. Hnehna changa an lo kir theih nan duhsakna a hlan a ni. Viksit Bharat Young Leaders Dialogue, 2026 a kal turte thlahna hunah hian Larsap chuan Mizoram aiawh turte chu an chanvo tur leh inpuahchahnate a sawipui a. Thalaite chuan sawrkarin hetiang ang hun remchang a siam sak avang leh, Larsap-in an puala inkawmhona hun a buatsaih avanga lawmthu sawiin, Mizoram tana hlawhtlinna chang tura theihtawp chhuah an tum thu Larsap hi an hrilh a ni.
He hunah hian Pu Joseph Lalrinawma, Addl. Secretary to Governor; Pu H. Dolianbuaia, Jt. Secretary, Sports & Youth Services Department; Pu H. Lalhmingthanga, Director, Sports & Youth Services Department leh official dangte an tel a ni.Viksit Bharat Young Leaders Dialogue 2026 hi January 9-12, 2026 chhung hian Bharat Mandapam, New Delhi-ah neih a ni ang.
