Kolasib-ah kangmei chhuah thulha chhanchhuahna ‘mock exercise’ neih a ni
Vawiin khan Deputy Commissioner leh Chairman, District Disaster Management Authority (DDMA) Kolasib District ruahmannain District Institute of Education and Training (DIET) Kolasib-ah kangmei chhuah thulha chet lak dan tur enchhinna ‘Mock Exercise on Fire’ neih a ni.
He Mock Exercise hi State Sorkar-in January atanga March thla chhunga Mock Exercise neih tura Calendar a siam bawhzuina atana buatsaih a ni a. He hunah hian State Disaster Response Force (SDRF) Mualvum, Fire & Emergency Services, Medical Team leh Quick Response Team (QRT) te chuan kangmei a lo chhuah palha chhanchhuahna hna thawh dan tur hrang hrang a takin an entir a ni.
Mock Exercise hi chawhma dar 11:45-ah tan niin chawhnu dar 12:30-ah tluang taka zawhfel a ni a. Hemi hnu hian thil kal dan thlirletna ‘Debriefing’ neih zui nghal a ni. Vawiina Mock Exercise neih hi DIET zirlaite leh zirtirtute chuan hlawkthlak an tih thu an sawi a ni.
Mock Exercise neih hma hian chawhma dar 10:30 khan Table Top Exercise leh Briefing neih a ni a. He hunah hian Pu Lalnunfela, District Organiser chuan Team hrang hrangte mawhphurhna leh chanvo te a sawifiah a. Kangmei laka inven a pawimawhzia te, chhiatna a lo thlen thulha lo inbuatsaih lawk a tulzia leh Plan mumal tak lo neih lawk a pawimawh thu a tarlang bawk a ni.
