Health Minister- Pi Lalrinpuii’n PGIMER, Chandigarh A Tlawh
Vawiin ni khan Health Minister Pi Lalrinpuii chuan Post Graduate Institute of Medical Education and Research (PGIMER), Chandigarh a tlawh a. Mizorama Medical College – ZMCH-ah zirna quality a lo that chhoh zel theihna turin PGIMER nena Teachers Exchange programme chungchang te, Students Exchange Programme neih theih dan tur kawng te a sawi pui a ni.
Minister hi Dr Vivek Lal, Director, PGIMER in a lo dawngsawng a, ZMCH nena thawhho theih dan kawng awm thei ngei se a duh thu a lo hrilh a ni. A rang thei ang bera thawhhona a awm theihna turin inremna thuthlung te pawh ziah ran a duhthu a lo sawi a. MD course ah sponsored seat an neih thu sawiin, PGIMER Director chhan Mizoram doctor te zingah entrance exam paltlang thei awm tam se a duh thu a lo sawi a ni.
Health Minister Pi Lalrinpuii chuan PGIMER hotute hnenah hian ZMCH a hawn thar tur Lung lam zaina – Cardio Thorasic chungchanga thawktu ten practical training an neih chhoh zel dan tur kawng a sawi pui bawk.
Minister hi Pi Lalzarmawii, IAS, Commissioner & Secretary leh Pu H. Lalhruaitluanga, Under Secretary & PS to Minister ten an tawiawm a ni.
