DM&R leh Cooperation Commissioner & Secretary Pu Udit Prakash Rai chuan Lunglei a tlawh
Mizoram sawrkara Disaster Management & Rehabilitation (DM&R) leh Cooperation Department Commissioner & Secretary Pu Udit Prakash Rai, IAS chuan vawiin khan Lunglei tlawhin, district official-te nen Lunglei DC Conference Hall-ah DM&R leh Cooperation Department hnuaia hma lakna hrang hrang an thlir ho.
Pu Udit Prakash Rai chuan kumin January ni 15-a Mizoram puma lirnghing vanga chhiatna thlen thulha chet lak dan en chhinna (mock exercise) buatsaihah Lunglei District chuan ṭha taka an tih tur an hlen chhuah avanga lawmawm a tih thu sawiin, District Disaster Management Authority (DDMA), department hrang hrang leh mipuite chungah lawm thu a sawi a. Chhiatna hrang hrang thleng thei lakah inralrin reng a ṭul thu leh Disaster Management Plan leh chhiatna laka himna tura inkaihhruaina hrang hrangte chu official-te leh mipuite’n ṭha taka zawm a pawimawh thu sawiin, chhiatna thlen thulha chhanchhuah hna leh chhawmdawl hna thawhna kawngah official-te chu rang taka che chhuak ṭhin turin a chah a. Cooperation Department-a thawktute pawh cooperative society kal tlanga mipuite’n hmasawnna tam zawk an neih theih nan sawrkar ruahmanna hrang hrangte chu ṭha taka kalpui turin a chah bawk.
Lunglei DDMA Chairperson & District Bawrhsap Pi Navneet Mann chuan inlawmna thu sawiin, Lunglei District dinhmun a hmun ngeia enfiah tur leh thawktute nena an harsatna hmaichhana sawi ho tura Lunglei a tlawh avangin Commissioner & Secretary chu lawm thu a hrilh a. District hmingin inlawmna thilpek a hlan bawk.
DM&R District Organiser Pi Chuaupari Pachuau chuan DDMA hma lakna hrang hrang te, kum nga liam ta chhunga Lunglei District-a chhiatna thlen dan leh kum 2024–2025 aṭanga tun thlenga State Disaster Response Fund (SDRF) hnuaia ṭanpuina pek chhuah dan te powerpoint presentation hmangin a sawi fiah a. Cooperaritive Audit Officer Pu Lalruatfela Sailo chuan powerpoint presentation hmangin Lunglei District-a Cooperation Department hma laknate a sawi fiah bawk a. Zawhna leh chhanna leh sawi hona hun hman niin, Additional Deputy Commissioner Pi Rochuangkimi Khenglawt chuan lawm thu sawiin hun a khar.
