Deputy speaker hovin kolasib khawpui chhung leh kolasib district chhunga kawngpui siam that dan tur sawiho
Vawiin khan Deputy Commissioner Conference Hall Kolasib ah Pu Lalfamkima Dy. Speaker, Mizoram Legislative Assembly leh Kolasib Bialtu ni bawk hovin, Kolasib khawpui chhung leh Kolasib district chhunga Mizoram PWD enkawl kawngpui te thal chhunga siam that dan tur ngaihtuah in an thukhawm.He hunah hian Pu Lalfamkima chuan kawngpui te fur chhunga nasa taka a chhiat tawh avangin thal lo thleng turah working season a in tan dawn a, chuvangin kan kawngpui te leh khawpui chhunga kawng te a theih ang anga siam that a pawimawh tih sawiin, heng kawngpui enkawltu PWD hotute chu an hma lak dan tur ruahmanna an neih dan te zawtin a sawipui.
He hunah hian PWD National highway EE, Er. Lalduhthlanga chuan an enkawl chin highway leh khawchhung inkawlpawhna thenkhat siamtha tura ruahmanna an kalpui thu sawin, hei bakah hian Bairabi to Bilkhawthlir National Highway 06 a hma an lak dan te sawiin, Zero point to Bilkhawthlir inkar tender chhangtu contractor Tanor Engineering Pvt. Ltd te chu an hna thawk tura vawi tam tak an hrilhhriat tawh thu a sawi. Kolasib khawpui chhung kawng enkawltu Kolasib PWD Division EE Office chu Court thupek angin an Office kalh sak a ni a, an hmanraw thenkhat hrensak ni mahse, sorkar hmalakna in vawiin khan court thupek stay order chu sut a nih thu Pu H. Lalfakzuala EE Kolasib Division chuan a sawi a. Kolasib khawpui chhung kawng siamthatna tur sorkar atangin sum an la dawn loh thu sawiin, sum an hmuh veleh hna thawh nghal theih an beisei tih a sawi bawk.
Vawiina Deputy Speaker in PWD hotute a kawmna ah hian Pi B Malsawmtluangi, Addl DC Kolasib te, PWD EE Higway Division III Thingdawl te, PWD EE Kolasib Division te, Kolasib Joint VC Chairman te, Sub Hqs YMA President leh Secretary te, MJA Kolasib President te leh sawm bik mi pawimawhte an tel a ni.
