CHIEF MINISTER-IN AIZAWL CIVIL HOSPITAL TRAUMA CARE FACILITY HAWNG

Vawiin khan Chief Minister Pu Lalduhoma chuan Aizawl Civil Hospital Trauma Care Facility thar a hawng.

A hawnna thu a sawinaah Chief Minister chuan, Aizawl Civil Hospital hmasawnna leh mipuite mamawh em em Trauma Facility kan hawng thei ta hi ka lawm hle a, hmasawnna chhinchhiahtlak a ni. A hming ang tak hian rikrum thila kan mamawh, nunna chhanna hmanhmawhthlak thawhna hmun a ni a, mi tin tana hmunhma tangkai a ni. A hlawhtlin theih nana mawhphurtute zawng zawng chungah lawmthu ka sawi.

Aizawl Civil Hospital Block A leh Block B sak thatna tur hi PMJVK atangin Rs. 88.33 Crore ruahman a ni a, hna hi tan thuai a ni ang. Tin, he Hospital-ah hian Lung zaina hmun te, Kidney thlak theihna te, IVF tihna te dah kan rilruk a. Kan doctor ten an thiam em em a, an mamawh facility hi kan pe lo ni mai zawkin kan hria. An mamawh hmunhma leh hmanruate hi chhawpsak a, phai lam kan panna thin tam tak hi neih ve kan tum a ni, a ti. Facility Centre chu tihchangtlun zel a ni dawn a, a sir a hmuhma zim te, Health Department ta ni si lo pawh hi sawiho thain ka hria, a ti a. AR ram chhuahsana Aizawl Police Station dah a, tuna Police Station hi Civil Hospital zauh nana hman AR ram Advisory Committee-in a thuphunga a remtihsak thu a tarlang bawk.

Pi Lalrinpuii, Health Minister pawhin thusawiin, Chief Minister Pu Lalduhoma’n Health Department tana hma a lak nasat tawh dan leh an dil apiang a la pek deuh zel thu a tarlang a. Hei hian Chief Minister-in kan ram mipuite hriselna a ngaihpawimawhzia a tilang a, sawrkar hospital tihhmasawn hi mirethei zawk te tan bawk a lo hlut thin avangin, mirethei zawk te hmakhua a ngaihzia a chiang hle a ni, tiin Chief Minister chungah lawmthu a sawi.

Inkhawm hi Pu H. Lalengmawia, Commissioner & Secretary, H&FW in a kaihruai a, Dr. SR Ngurchamliana, Director, H& ME in technical report a pe.

India sawrkar hian National Highway km 100 dan zelah Trauma Centre hi dah tur – tih dan a nei a. Kawngpui (Highway) a chetsualna tawk te chuan darkar khat chhungin Trauma Centre an thleng hman tur a ni, tiin trauma centre din dan tur duansa a awm a ni. Mizoramah hian Trauma Care Facilities hi Hospital 7 (pasarih) ah din a ni ta a. Sawrkar laipui policy nen a kalphung a inmil hle.

Heng centre te hi Lawngtlai leh Lunglei tih loh a dang zawng chu an function vek tawh.

Civil Hospital Aizawl bik hi a sakna tur ram chungchangah buaina a awm avang leh Covid 19 avangin sak mai lohvin a awm a, kum 2022, Febuary khan sak tan a ni a, vawiinah hawn a ni ta a ni.

A building sakna sum hi central atangin Rs 121.50 lakh dawn a ni a, state sum Rs 450.00 lakh pek belh a ni. A buildingah hian Reception leh triaging area, Treatment area, Observation room, imaging room (Xray/CTsacan) Minor OT/Resucsitation room leh doctor/Staff room te a awm a, a chunglama zawm theih tura duan a ni.