Chief minister hovin scram meeting neih a ni
Vawiin khan Planning & Programme Implementation Department Conference Hall-ah FOCUS 2.0 hmalakna tura thuneitu sang Society for Climate Resilence Agriculture in Mizoram (SCRAM) te chu an Chairman Pu Lalduhoma, Chief Minister hovin an thukhawm. FOCUS 1.0 hnathawh hun chhung a zawh tawh avangin Mizoram sorkar chuan FOCUS 2.0 hmalakna hi Handholding Scheme nena kal dun tura kalpui leh a remti a. International Fund for Agricultural Development (IFAD) sum Rs. 380 Cr. hman phalna hi State sorkar Finance Department chu pe tawhin, sorkar laipui lamah dilna thehluh mek a ni. Department hrang hrangten hma an lakhona (convergence) a nih angin Planning & Programme Implementation Department hnuaia kalpui tur a ni ang.
FOCUS 2.0 thuneitu sang ber Governing Council thar dinna Notification hi August ni 20 khan tihchhuah niin, a hming hi “Society for Climate Resilient Agriculture in Mizoram (SCRAM)” a ni a. Chief Minister chu Ex-officio Chairman niin, Planning Secretary chu Ex-Officio Member Secretary a ni. FOCUS 2.0 hi kum ruk chhung kalpui tur a ni ang. Meeting hian FOCUS 2.0 project mil turin kalphung thenkhat thlak an remti a, nihna hming (nomenclature) thenkhat thlak an rem ti a, FOCUS 1.0 atanga bungrua leh hmanruate chhawm chhoh dan turte an rel a, state Level leh district level-a thuneitu turte, Village level-a thuneitu turte an rel a, hnathawktu tur pawh khawm dan tur leh a tul anga lak dan turte pawh an sawi.
FOCUS 2.0 hi district 11 a khaw 700 tuama chhungkaw 75000 huama kalpui tur a ni a. Ram nei lo (landless farmers) chhungkua pawh chhungkaw 7000 target siam a ni. A chhawrtu (beneficiary) zatve hi hmeichhia ni thei tura duan a ni bawk. Meeting-ah hian Pu PC Vanlalruata, Agriculture Minister, Pu Lalthansanga, Land Resources, Soil & Water Conservation Minister, Pu TBC Lalvenchhunga, Adviser to CM, Dr. KC Lalmalsawmzauva, Adviser to CM, Pu Khilli Ram Meena, Chief Secretary bakah member dangte an tel a ni.
