Health Minister Pi Lalrinpuii’n Global Cancer Summit vawi 7-na hmanpui
Nimin khan Swatantra Bhawan Auditorium, Banaras Hindu University, Varanasi, Uttar Pradesh- ah 7th Global Cancer Summit chu Health Minister Pi Lalrinpuii’n a hmanpui. Kumin summit thupui chu “Living with cancer in the 21st Century” tih a ni.
He hunah hian thusawiin Pi Lalrinpuii chuan, Mizoram chu India rama cancer sanna ber a nih avanga kan harsatna hrang hrangte a tarlang a. Zuk leh hmuam ti kan tam avanga cancer chi hrang hrang a tam thu te leh hmeichhia chhul cancer venna HPV vaccine chungchanga kan hmalakna hrang hrang te a sawi a ni.
Health Minister chuan Mizoramin cancer research centre kan mamawhna a san thu leh, Mizoram hmasawnna tura cancer research centre changtlung zawk neih theih dan kawng awm se a duh thu a sawi bawk.
Health Minister chuan he summit a tel mi thiam tak tak te nen inkawmhona hun an hmang zui nghal a. Central Sawrkar hnuaia ICMR leh Department of Science & Technology te nen ṭang tlanga Mizorama cancer hluar chhan zirbingna tur – Cancer Research Centre neih theih dan tur kawng dappui tura an inhawn thu Minister hi an hrilh a ni.
He summit-ah hian cancer natna chungchanga mi thiam sawm bikten paper presention an nei a. Cancer research lama hnuhma nei tha tak takte pawh an tel a ni.
