Excise Minister hovin Aizawl West II Assembly Constituency Ruihhlo Do Meeting neih a ni
Vawiin chawhnu khan Excise and Narcotics Department Minister Pu Lalnghinglova Hmar hovin a bial Aizawl West II Assembly Constituency Ruihhlo Do Meeting chu Cultural Centre cum Auditorium, Aizawlah neih a ni a. Ward no XII Corporator Pi C Vanlalhruaii, Ward no XIII Corporator Pu Vanlalhruaia leh Aizawl West II huam chhunga Local Council te, NGO leh kohhran aiawhte an tel a ni.
Minister chuan thu sawiin ruihhlo do hlawhtling tur chuan sawrkar tha chakna chauha innghah theih a nih loh avangin kohhran te, tlawmngai pawl te leh khawtlang hruaitu te chu thawhpuiah a sawm nawn a. Ruihhlo la tichhin lo ten an tihchhin loh nan nasa lehzuala inzirtirna kalpui a tul thu sawiin ruihhlo che vel khuahkhirh tura sawrkar leh mipuite thawhhona a fak bawk. Minister chuan thalaiten ruihhlo an khawih tanna chu pawi tham ni loa kan ngaih te a ni fo tih sawiin nu leh pa te, an chenpui te leh zirtirtu te chu an naute ngaihven reng turin a chah a. Ruihhlo ngawl vei mekte enkawlna kawngah pawh tan lak a tul thu sawiin Minister chuan ruihhlo do turin kan la tlai chhe lo a, kan zavaia theihtawp kan chhuah phawt chuan danglamna lian tak kan thlen thei a ni a ti.
Excise & Narcotics Commisioner Pu Z Lalhmangaihan meeting hi a kaihruai a. Excise & Narcotics (Enf.) Joint Commisioner, Pu Peter Zohmingthangan PowerPoint Presentation hmangin Mizorama ruihhlo dinhmun tlangpui a sawifiah a. Zawhna leh chhanna hun leh sawihona hun hman a ni bawk.
