Chief minister-in bana kaih atanga sak tbcc-a in thar hawng

Vawiin khan Chief Minister Pu Lalduhoma chuan Tawngtai Bethel Camping Centre, Sakawrtuichhuna Banakaih (Handholding) Scheme hmanga camping centre sak, Jesaia Room, camper mi 80 atanga 90 leng chu a hawng.

Thu sawiin Chief Minister chuan 2023-a Chief Minister-a lakluh a niha a tlawh hmasak ber chu TBCC hi a ni a, a hnuah pawh ka tlawh leh a vawiin hi ka vawi thum tlawhna a ni. Tunah chuan in lo changtlung ta hle a, inthiarna leh kawt zawl tha tak in nei a, choka in nei hrang vek bawk a, in hmasawnnate hmuh a nuam hle mai. Sawrkar pawhin sum a neih ang angin ruihhlo ngaite chhawmdawl hna hi kan thawk a, TBCC ngei pawh hei kan hmuh angin Mosia room kan sa tawh a, tunah Jesaia room kan hawng leh ta a. Heng kan hmalaknaah hian central YMA ten min thawhpui tha thin a, kan lawm hle a ni.

He camp-ah hian mi 805 in awm mek a, thawktu tlemtein fel taka in enkawl zo thei hi a ropui ka ti a. In inpekna thukzia a lang a ni. TBCC vawi hnih lai a function loh tum khan Aizawl khawpui tan a buaithlak hle a, tun atan chuan TBCC tel lo hian kan khawsa thei lo a ni, tiin TBCC a thawktute chungah lawmthu a sawi a ni.

Chief Minister chuan, Lungin tang zinga za zela 98 hi drugs leh a kaihhnawih avanga tang an ni a, a tam zawk hi drugs zawrh vanga tang an ni ber a. Za zela mi 41% te hi an tang nawn nghe nghe a ni. Chutiang dinhmuna kan din avang chuan ruihhlo avanga hliam tuarte chhawmdawl hi kan ngaihpawimawh a, Hulhliap Short Stay Centre-te kan din a, mi 192-te hnenah skilled training neihtirin, tunah hian mi 21 hnenah Banakaih (Handholding) Scheme kaltlangin eizawnna bultanna kan pe hial a ni.

Eizawnna mumal neih loh chuan tlukna ngaiah an tlu nawn fo thin tih hre reng chungin sawrkar chuan heng ruihhlo ngai enkawlna dawng chhuak tawhte hi an thiam zawng thilah (skill) training pein Banakaih Scheme hnuaiah an dam khawchhuahna atan tan a la tihna a ni. Ngawl vei sim tawh, Jail tang chhuakte pawh training pek zel hi tha ka ti a, Kohhran, khawtlang leh NGO hrang hrangte thawkko zelin chhunzawm zel dan kan dap dawn a ni.

Aftercare facility hi duh angin kan la nei tam tawk lova, kohhranho nen tangruala din hi tha ka ti a. Pathian rawngbawlna atana hmanga duat taka heng tanpui ngaite lo tuamhlawm duhtu kohhran chu thawhpui a, sum leh paia puih a, a management hi kohhran kutah hlan hi a tha ka ti  a ni, a ti.

Central YMA President Pu R. Lalngheta pawhin, thusawiin, camper-te chu TBCC atang hlawhtling taka an chhuah hnuah an veng YMA-ten an lo lawm dawn tih hrilhin, kawng hlui zawh tawh lo va, nunna thar nena chhuahsan ngei turin a chah a ni.

TBCC Founder Pu TT Zohmingthanga pawhin thu sawiin Chief Minister Pu Lalduhoma’n TBCC a ngaipawimawh thin avangin lawmthu a sawi a. Tun hnaiah pindan thar pahnih sorkar tanpuinain kan han nei thar a, damlo tam zawk kan enkawl theih phah dawn a, chhungkaw tam tak tan malsawmna a ni dawn a ni, a ti.

Mosia room hi kumin March thla khan sak tan a ni a, thla 1 leh ni 22 chhung sak niin Rs. 13.82 lakh sen a ni a. Vawiina Chief Minister-in a hawn Jesaia Room hi June ni 23-ah sak tan niin kar hmasa ni 15 khan  sak zawh a ni a, Rs. 14.58 lakh sen a ni. A sakna sum hi sorkarin a tum a, a sak hna hi CYMA in a buaipui a, campers ten tha an thawh thin a ni.

Inkhawm hi Central YMA Vice-President Prof. Lalnuntluangan a kaihruai a, CYMA Treasurer Er. H. Duhkima’n Room thar sak chungchangah Report a pe a. Adviser to CM Pu Lalmuanpuia Punte, Central YMA hruaitute, TBCC Advisory Member-te bakah official leh mi tlawmngai dangte an tel a ni.