Adviser to CM Pu TBC Lalvenchhunga’n PMEGP Entrepreneurship Development Programme a hawng
Vawiin khan Prime Minister’s Employment Generation Programme (PMEGP) hnuaia Entrepreneurship Development Programme (EDP) hawnna hun chu Khadi and Village Industries (KVI) Board hnuaia Multi-Disciplinary Training Centre (MDTC), Zemabawk-ah hman a ni a, Adviser to Chief Minister (Finance & Planning) Pu TBC Lalvenchhunga chuan khuallian niin he hun hi a hmanpui. Pu TBC Lalvenchhunga hian he programme rual hian MDTC hmunhma leh training kalpui mekte a enpui nghal bawk.
Pu TBC Lalvenchhunga chuan thu sawiin, PMEGP scheme chu Mizoram sawrkarin a ngaihven a, sawrkar flagship programme ‘Bana Kaih Scheme’ nena finkhawm (converge) a ni, a ti a. PMEGP beneficiaries te chu ‘entrepreneurs’ an nih thu sawiin, sumdawng hlawhtling ni tur chuan dan leh hrai , thil vawn fel leh tax chungchang te inzir peih a ngaih thu a sawi a. Beneficiaries ni tura thlan chhuahte chu mi taima leh inchhiar zau mi an nih thu sawiin, kalkhawmte chu marketing lamah tang lehzual tur leh sum an hmuh turte chu a nihna tur taka hmang tangkai turin a fuih bawk a ni.
Mizoram Khadi & Village Industries Board (MKVIB) Chairman, Pu C. Lalremliana chu khualzahawm niin thu a sawi a. PMEGP chu Bana Kaih nena converge a nih avangin beneficiaries te pawh uluk lehzuala thlan chhuah an nih thu leh PMEGP Margin Money hmang dik tawk lo an lo awm tawh thin chu pawi a tih thu a sawi bawk. Vawiina beneficiaries thlan chhuahte chu hlawhtlinna chang ngei tur leh, endik (inspection) pawh hmachhawn ngama, dik leh taima taka thawk turin kalkhawmte chu a chah a ni.
He hunah hian MKVIB CEO, Pu Hnamlunchhunga chuan report pein, Entrepreneurship Development Programme (EDP) chu training kimchang tak a nih thu leh subject hrang hrang 22-ah Resource Person-te rawiha, beneficiaries-te zirtirna pek an nih dawn thu a sawi a. Training chhunga attendance ngaih pawimawh a nih dawn thu leh EDP certificate hmu tura 80% attendance neih a ngaih dawn thu a sawi bawk.
