Rural Development Minister Prof. Lalnilawma hovin thingphun hnatlang
Vawiin khan Rural Development Minister Prof. Lalnilawma hovin DRDO Office Aizawl chuan Green Mizoram 2026 denchhenin Sakawrhmuituai tlangah Thingphun hnatlang an nei a. Thing tiak 20 lai an phun.
Rural Development Minister Prof Lalnilawma chuan tunlaiah sik leh sa danglam zelah ruahtui tlak dan a mumal thei tawh lova; chu chuan chhungtinin kan mamawh em em tui harsatna a siam nasa em em a ni, a ti a. Khawvel hmun hrang hrangah tui harsatna hian zual lam a pan zel a, boruak thianghlim leh sik leh sa mumal tak min pe theitu thing phun hi a pawimawh em em a ni, a ti. Tam tak phun a pawimawh rualin kan phun chhun ang ang te him taka an dam khawchhuah theih nana uluk taka enkawl zui a pawimawh em em a ni, Minister chuan a ti a. Mihring te hian kan nitin mamawh ei leh bar zawnna kawngah te kan kih / lak ngaih chang awm ve bawk mah se, kan mamawh bak hi chu khawih loh leh humhalh te, duat taka enkawl te hi kan mawhphurhna a ni tih hre reng turin mipuite a chah a ni.
DRDO Office ten leitha leh a hungna mumal tak nena thingphun hnatlang an ko chu fakawm a tih thu a sawi a. Tui hna humhalhna tur leh a pun belh zel theih nan thingphun leh enkawl zui uar turin Minister chuan a chah a ni.
Mizoram Sawrkar Forest Department te chuan vawiina thingphun tak te hi thlawnin an pe a. Pu Lalnundika MCS, Project Director, DRDO leh Dr Lalchamliani, BDO Tlangnuam leh Sihphir VC ten ruahmanna siamin a huhova thingphun hnatlang hi buatsaih a ni.
