Tourism Minister Pu Lalnghinglova Hmar hovin Khawzawl District-a ‘Pluck & Pay Festival’ neih dan tur rel

Vawiin khan Pu Lalnghinglova Hmar, Minister of State (i/c), Tourism Department hovin sawrkar mi pawimawh leh khawtlang aiawhte’n Khawzawl District-a ‘Pluck & Pay Festival (Lo la, lei rawh) hman dan tur chu MINECO-a Tourism Minister office chamber-ah rel a ni a, September ni 23 – 25 chhungin Chawngtlai leh Tualte-ah hman nise an ti.

Tourism Minister Pu Lalnghinglova Hmar chuan, “Pluck & Pay kalhmang hi Mizoramah chuan thil thar tak a la ni a, Mizoram Tourism-ah bung thar kan kai thei dawn a, a phurawm takzet a ni.” a ti a. Mizoram sawrkarin mipui leh khawtlang nena tangruala tourism hmasawnna kalpui, ‘community-based tourism’ a uar tih sawiin, Pluck & Pay festival-ah pawh hian department in sumdawn a tum lo a, a thlengtu khuate’n hlawkpui se sawrkar chuan a duh ber thu a sawi a ni.

Meeting chuan ‘Lo la, lei rawh’ tih kutpui chu thlai hrang hrang puitlin hun September thla chawhnu lamah nithum chhung hman nise tiin a rel a. A hawnna hi Tualte ah neih tur niin, Chawngtlai-ah a kharna hun hman nise tih a ni bawk.

Pluck & Pay festival-ah hian a thlengtu khuaa lo leh huanah te kalin, thlai leh theite chu mahni a lovin a lei theih dawn a. Thlai leh thei lawh mai bakah mikhualte tana tih tur hrang hrang – pipu uai, sairawkherh inperhsiak, kalchhet kal etc. te chu a hmunah buatsaih nise tih a ni. Khaw pahnihah hian thlai leh thei bakah thildang chi hrang hrang zawrhchhuahna tur stall siam a ni bawk ang. Tin, a hawnni leh tawp zanah concert buatsaih nise tih a ni bawk.

Meeting chuan state chhung leh pawn thleng pha turin publicity kalpui hma nise a ti a. Tunhnaia tourism event hrang hrang thlirin chhimtu thahnem tak awm tura beisei a nih thu ngaihthlak a ni. Programme kimchang chu Deputy Commissioner, Khawzawl District hovin Organising Committee in an lo rel chhunzawm dawn a ni.