Lunglei Ramtharah 40 Days Healthy Lunglei Intensive Campaign hnuaiah hriselna chungchang inzirtirna leh hriselna dinhmun endikna buatsaih a ni
Nizan khan BCM Ramthar, Lunglei Kohhran Hall-ah Ṭhalai Kristian Pawl (ṬKP) Ramthar Unit-a Group pathum – Marka, Luka leh Johana Group te nen 40 Days Healthy Lunglei Intensive Campaign hun hman niin, hriselna chungchang leh LushAI Healthy Lunglei App chungchang inzirtir a nih bakah, a thlawnin kal khawmte hriselna dinhmun endiksak an ni.
District Administration ai awhin Pi L. Lalremruati’n hun kaihruaiin, Healthy Lunglei Campaign buatsaih chhan a sawi fiah a. Health ATM chungchang leh a ṭangkai dan leh hman dan te sawiin, Lunglei District chu Mizorama Health ATM nei hmasa ber a nih thu a sawi a. Kal khawmte chu Civil Hospital Lungleia Health ATM-ah an hriselna dinhmun te enfiahtir ve ngei turin a sawm a. LushAI Healthy Lunglei App chungchang leh a ṭangkaina te a sawi zau bawk.
Health Department aṭangin Chanmari Health & Wellness Centre-a Health & Wellness Officer Pi Lalawmpuii Fanai chuan hriselna ngaih pawimawh a ṭulzia sawiin, natna inkai chhawn theih loh (non-communicable disease: NCD) laka inven dan leh hriselna atana tih tur leh tih loh tur hrang hrangte a zirtir.
He hunah hian ṬKP member mi 70 chuang an kal khawm a. Medical Team te’n health screening buatsaih chhunzawmin, kal khawmte hriselna dinhmun endik a ni a. Kal khawmte chu LushAI Healthy Lunglei App hman dan a taka zirtir niin, App hi download-tir vek an ni bawk.
LushAI Healthy Lunglei app hmang hian district chhunga sawrkar damdawi in leh health centre-a daktawrte ṭhut hun tur a en theih bakah, OPD-a inentir turin appointment a lak lawk (book) theih a. ABHA-a inziah luhna te, he app-a inziak lut damdawi dawr (pharmacy)-te aṭanga damdawi chah theihna te awmin, hriselna lama hriat tur pawimawh hrang hrangte pawh awlsam takin a hmuh theih a. OPD appointment laknaa pui thei tur leh zawhna hrang hrang Mizo ṭawnga chhang thei tur AI chatbot dah tel a ni bawk a. Android hmangte tan play.google.com/store/apps/details?id=com.lushaihealthylunglei.android aṭangin leh iOS hmangte tan apps.apple.com/in/app/lhl/id6755673586 aṭangin download theih a ni.
