Rajya Sabha MP inthlan chuh turten thu an tiam
June ni 18, 2026-a Rajya Sabha MP inthlan lo awm tur atana Mizoram atanga seat khat awm chuh tum candidate ten vawiin khan Returning Officer Pu Zothansanga Ralte, Commissioner & Secretary, Mizoram Legislative Assembly hnenah India ram dânpui (Constitution) rinawm leh thuawih taka zawm tur leh, constitution in India ram thuneihna a pek leh inpumkhatna vawnghim turin thu an tiam a ni.
Vawiin chawhnu dar 3:00 a nomination file hun khar a nih veleh khan Rajya Sabha MP election candidate pahnihte hi Returning Officer Pu Zothansanga Ralte, Commissioner & Secretary, Mizoram Legislative Assembly pisa ah anmahni tawiawmtute nen an kal nghal a, Mizo National Front (MNF) official candidate Pi Zothansangi Hmar chuan thutiam a la hmasa a, hemi zawh veleh hian Zoram People’s Movement (ZPM) official candidate Pu K. Laltluangkiama’n thutiam hi a la chhunzawm ve nghal a ni.
Election Commission of India thuchhuah danin nomination file te hi naktuk June ni 9, 2026 ah endik a ni ang a, June ni 11, 2026 thleng inhnuhdawhna hun hawn a ni ang.
June ni 18, 2026 (Ningani) zing dar 9 atanga tlai dar 4 thleng vote thlakna hun hawn a ni ang a, hemi ni vek tlai dar 5 ah vote chhiar nghal a ni ang.
June ni 18, 2026 hian Mizoram bakah Manipur, Meghalaya leh Arunachal Pradesh ah te seat 1 theuh, Andhra Pradesh, Gujarat leh Karnataka seat 4 theuh leh Rajasthan leh Madhya Pradesh-ah seat 3 ve ve leh Jharkhand a seat 2 hnawhkhat turin Rajya Sabha MP thlanna hi neih tur a ni.
