Sumdawnna kawngah India ram Danpui kalh loa ram leilungfate humhalh dan tur ngaihtuah
Vawiin khan Mizoram Secretariat Conference Hall, MINECO ah Dr. H. Lianzela, IAS, Secretary, Commerce, Industries, Geology & Mining Department hoin The Draft Mizoram Trade and Enterprises (Formalization and Facilitation) Bill, 2026 chungchang sawiho a ni a. He hunah hian CYMA, MZP, MSU, MCCI, AMFU, City Local Council Association leh he bill in a kaihhnawih tur Department hrang hrang aiawh te an tel a ni.
He dan thar tura duan hi Mizoram chhunga sumdawnna felfai zawka kalpui dan tur leh bazar hrang hrangte enkawl dan tur chungchang a ni a. Sumdawnna kawngah India Danpui (Constitution) kalh silo a ram leilungfate humhalh an nih theihna tura fimkhur taka Dan siam a nih theih nan inrawnkhawmna (consultation) hi neih a ni.
He inrawnkhawmna hi a bul tanna niin, zau zawka inrawnkhawmna hi la neih leh tur a ni a. Kalkhawm te ngaihdan leh rawtna te chu ziakin June ni 30, 2026 ral hmain Commerce, Industries, Geology & Mining department-ah thehlut tura ngen an ni. Chairman Dr.H.Lianzela chuan he Dan thar duan turah hian theihtawp chhuah tlang turin leh a tha thei ang bera Dan siam a nih theih nan kalkhawmte chu thawhpuiah a sawm a ni.
