HIV/AIDS Vanga Boral Te Hriatrengna Hun Hmang
Vawiin khan Positive Women Network Of Mizoram (PWNM) chuan HIV/AIDS vanga boralte hriatrengna hun International AIDS Candlelight Memorial Service chu Mission Vengthlang Kohhran Golden Jubilee Hall-ah an hmang a, Minister Pi Lalrinpuii, Health and Family Welfare Department chuan khuallian niin hun a hmanpui.
Minister chuan Positive Women Network Of Mizoram-te HIV/AIDS vanga harsatna tawkte tanpui tura an awm chu a lawmawm a tih thu sawiin, HIV/AIDS vanga boral tawh te chu hriatreng an nih thu a sawi a, harsatna tawk mekte pawh an lungngaihna leh manganna hriatsak an nih thu sawiin, damdawi leh eitur tha zawk an neih zel theihna tura theihtawp chhuah zel turin kalkhawmte a chah bawk a ni.
Dr. Jane Ralte Project Director, MSACS pawhin thu sawiin kalkhawmte chu thawhhopuiah a sawm a. Kohhran ten PWNM-te an support tlat avanga lawmthu sawiin, tun aia nasa zawka HIV laka invenna leh inenkawlna lamah nasa zawka inzirtirna kan neih a la tul thu a sawi bawk.
Kalkhawmna hunah hian mi pahnih hnenah chawimawina hlan a ni a, Dr. Lalrempuii, Head of Department ICTC chu HIV Positive-te tana a thawh nasat vang leh Mizoram a Quality HIV testing tih a nih theih nana a hma lakna vanga hlan a ni a, pakhat hi Pu John Thansanga, Project Director, Samaritan Society niin, Drug Addict leh HIV Positive-te tan a hun pum pea a thawh that em avanga hlan a ni.
Mizoram chhunga kohhran pawl hrang hrang, NGO aiawh te, PWNM member leh Client te hun hman naah hian an tel a ni.
