Lok sabha mp pu richard vanlalhmangaiha’n thingdawlah futsal ground thar a hawng
Vawiin chawhnu khan Lok Sabha MP Pu Richard Vanlalhmangaiha chuan Thingdawl V/C-II huamchhunga Futsal Ground thar chu a hawng. He hunah hian Kolasib Deputy Commissioner Pu H. Dolianbuaia chuan a tawiawm a ni. Khuallian MP Pu Richard Vanlalhmangaiha chuan Futsal ground peihfel a ni chu lawmawm a tih thu a sawi a. Ruihtheihthilin thalaite a tihbuai nasatzia tarlangin, Mizoramah ruihhlo (drugs) hmang mek mi 14,000 chuang record an awm thu a sawi. Mizorama ruihhlo hmang (drug users) chu 6.9% lai niin, India ram pum chawhrual aiin a sang daih a ni, a ti. Tun dinhmunah de-addiction centre hrang hrangah mi 5,000 chuang an awm mek thu a sawi bawk. Kum 1990 atanga chhutin Mizoramah HIV hrik pai mi 30,000 chuang hmuhchhuah an ni tawh a, ruihhlo leh HIV vanga nun chan pawh mi thahnem tak an awm tawh a ni, a ti a.
Ruihhlo dona kawngah hian mipui tanrual a ngaih thu leh, thalaite ruihhlo laka an boral zel loh nan tan lak a ngai a ni, a ti. Amaherawhchu,harsatna tam tak karah pawh kan thalaite an chhe vek bik lo a, ruihhloa buai lo, thalai fel tak tak an tam a, hengte pawh hi min fuih thartu atan kan hman a ngai a ni, a ti bawk. MP chuan hmeichhiate pawh infiamna ah thangchho zel se la, he Futsal ground pawh hi hmang tangkai ngei se a duh thu a sawi a. Sawrkar hmasawnna hnathawh te thlawp zel turin mipuite a sawm a, development hnathawh hrang hrang kal mekte pawh uluk taka lo chik (monitor) tura chahin, heng kawngah hian khawtlang tanrual a pawimawh thu leh chu chu ram hmangaihna lantirna pawimawh tak a ni, a ti. Kolasib DC Pu H. Dolianbuaia pawhin thu sawiin, Thingdawl khawtlangin infiamna lamah hmasawnna an neih a beisei thu sawiin duhsakna a hlan a. Thalaiten ruihtheihthil ti lova infiamna lama an tlan nan he khelmual hi hmanrua pawimawh tak a nih ngei a beisei thu a sawi bawk.
He hunah hian Khualzahawm Pu H. Lalfakzuala, ZPM Tuirial West Block President leh Pi Doris Lalrinawmi, Thingdawl BDO ten thusawina hun an hmang bawk. He Futsal Ground hi Member of Parliament Local Area Development (MPLAD) Fund 2024-25 atanga cheng nuai 15 senga sak a ni a. Futsal ground hawnna denchhen hian tournament buatsaih nghal a ni a, chhimtu mipui thahnem tak an tel a ni.
